DEN HAAG – Sekretario di Estado Raymond Knops (Relashonnan den Reino) por kuminsá prepará pa un debate pika ku Tweede Kamer. Mas i mas partido ke pa e intervení den reedifikashon di Sint Maarten.
Tweede Kamer ta ‘masha prekupá, awor ku e isla a kai den un krísis polítiko i konstitushonal. Despues ku gabinete Romeo-Marlin a kai luna pasá, e siman aki e pregunta ta surgi si e elekshon di novèmber por sigui.
Diferente partido di koalishon i oposishon otro siman ke tende di sekretario di estado Knops ’ki senario tin na man’ for di Den Haag pa garantisá e reedifikashon di e isla. Esaki a bin sali den un turno liber.
Mas partido ke intervení na Sint Maarten
Siman pasá CDA i VVD a bisa ku nan ta kontemplá un intervenshon na Sint Maarten via Konseho di Minister di Reino. Ámbos partido di koalishon ke pa Knops informá Kamer mas pronto posibel tokante kua ta e posibilidatnan ku tin.
Awor parse ku partido di oposishon PvdA tambe ta faboresé intervenshon gubernamental despues di kaida di gabinete Romeo-Marlin. ‘E drechamentu di e daknan i e aeropuerto, i e lantamentu bèk di ekonomia’ no por kore peliger ‘pa motibu di badabada polítiko i asuntu bruá’, e miembro di Kamer Attje Kuiken ta bisa. “Mi ta ferwagt sigur ku e sekretario di estado lo intervení den e kasonan aki.”
Intervenshon gubernamental ainda no ta den diskushon, e miembro di Kamer di D66 Antje Diertens ta haña. Promé e partido di koalishon ke sa di e sekretario di estado mes ‘ta kiko ta pasando eksaktamente’ i kiko tabata e resultado di e kombersashonnan te awor. Siman pasá Knops tabata na e islanan pa un bishita di trabou planeá.
‘Reedifikashon ta sigui, ku òf sin polítika di Sint Maarten’
Sí Diertens (D66) ke pa Hulanda intervení na un otro manera. Segun D66 e habitantenan di Sint Maarten entre otro mester por konta ku un bon kuido síkiko despues di orkan Irma. Diertens ke pa gabinete hulandes bira aktivo mandando organisashonnan di ousilio via di Banko Mundial.
SP tambe ke klaridat di Knops otro siman, tokante kua proyektonan Hulanda mes por tuma den reedifikashon. “Ke men loke nos por hasi, sin gobièrnu [di Sint Maarten ]”, miembro di Kamer Ronald van Raak ta bisa.
E instabilidat polítiko i korupshon di añanan largu na e isla ta prekupá SP. “Naturalmente ta masha straño ku nos mester reedifiká un pais outónomo, sin nan gobièrnu. Ta un situashon manera nunka no a mira”, segun Van Raak. “Aktualmente no tin masha sentido pa hasi palabrashon ku niun gobièrnu mes ku Sint Maarten por tin”.
Otro siman tin e debate ku Knops
Otro siman e debate anual ta tuma lugá tokante sèn i sosten for di Den Haag pa e partinan karibense di Reino. Den práktika e debate ta trata mas parti di aktualidat.
CDA ketu ketu a trata kaba di laga planeá un momentu e siman aki pa interogá gabinete. Pero esaki no a logra pa motibu di e agènda hopi okupá di Kamer.
