WILLEMSTAD- No opstante ku e kòntrakt entre Petroleos de Venezuela S.A. (PdVSA) i Refineria di Kòrsou (RDK) a terminá dia 31 di desèmber 2019, PdVSA lo paga pa permanesé algun tempu mas riba tereno di refineria Isla.
E motibu ta ku te ainda PdVSA atraves di e kompania Refineria Isla B.V. tin produktonan almasená den e diferente tankinan ku tin tantu riba tereno di refineria komo na Bullenbaai. RDK ku ta doño di e instalashonnan a bisa ku lo koperá pa PdVSA por disponé di su stòk di produkto i bende esakinan riba merkado internashonal.
Pa e periodo ku PdVSA permanesé riba e instalashonnan di refineria Isla e lo mester bai paga pa uso di e tankinan. “Nos ta bai hür e tankinan ku nan”, asina Marcelino De Lannoy, direktor interino di RDK a duna di konosé. De Lannoy ta stèns ku e kompania venezolano lo haña sufisiente fondo for di e benta di produkto pa paga e areglo di retiro di mas o ménos 900 trahadó ku tabata traha pa Refineria Isla B.V.