ORANJESTAD – Den tres luna lo a trata e molester di e dumpnan di sushi Parkietenbos y Ser’i Teishi. E promesa ey gobierno di Aruba a haci na hues den e caso urgente cu e habitante di bario Anouk Balentina a entama. E reaccionnan, tambe di hues, ta sceptico.
“Lo ta un milager”, hues ta bisa tocante di e promesa di gobierno cu den algun luna lo a soluciona e molester pa e habitantenan completamente. E no a sentencia sino el a pidi Balentina pa wanta su caso awor cu gobierno ta indica di por mehora e situacion riba termino cortico.
“Esey ta nifica tambe cu e candelanan y explosionnan den Parkietenbos manera tabatin ayera nochi lo ta soluciona?”, e habitante a puntra. El a bay hues despues cu durante añanan e no tabata logra nada cerca gobierno pa proteh’e y su famia contra e molester.
 potret di Sharina Henriquez Habitantenan di dump ta bira mas maloGobierno di Aruba ta bin cu solucion temporario un tras di otro pa e dump di sushi di mas grandi Parkietenbos cu ta haci e habitantenan malo. Pero e habitantenan ta keha cu esaki no ta pone nan bira bon, nan ta bira hasta mas malo. Lesa mas tocante di esaki: Con mal maneho ta haci habitantenan cerca dump di Aruba mas malo |
Na final Balentina ta bay di acuerdo cu e proposicion di e hues. Pero e ta mustra cu e medidanan di gobierno ainda no ta duna garantia.
“Mi yiunan y ami a bira malo di e emision di huma. E explosionnan ta spanta hende hopi y ta masha peligroso cu un aeropuerto cerca aki banda. Cu tur e trucknan di tanki di combustibel pa avion cu ta core pasa dilanti mi cas tambe. Gobierno tin aña ta papia, nan ta bin cu plan riba papel. Con esaki ta sirbi pa mi, mi no sa, algo mester sosode awor. Esaki no ta wega, sino un asunto di bida y morto!”
Serlimar no ta un bon gerente
Ta remarcabel cu gobierno awor den corte ta atmiti pa prome biaha cu e gerente di tur dos dump, e compania di gobierno Serlimar, no a haci su trabou bon.
E abogado di gobierno ademas ta trece e noticia grandi cu e maneho di e dump di Ser’i Teishi diripiente ta bou di encargo di e compania priva Ecogas. A firma e contract aki diaranson pasa (18 feb. Ta un paso remarcabely inespera pasobra te fin di aña pasa ainda tabatin un guera grandi entre e compania aki ye minister responsabel e tempo ey, Otmar Oduber.
Ser’i Teishi ta un dump di sushi nobo cu gobierno a cuminsa uza na 2018 pa alivia e dump ‘bieu’ Parkietenbos. Cu e medida aki gobierno kier a haci e molester di Parkietenbos menos pa e habitantenan di e bario. Pero e dump nobo Ser’i Teishi cu ta keda cerca ey, ta plama un holo putri penetrante. Asina esaki a causa mas molester y den mas bario.
Den corte gobierno ta priminti cu, cu Ecogas, awor nan tin e solucion contra di esaki.
Forno pa kima sushi
Un otro medida di gobierno pa maneha e molester di Parkietenbos, ta pa uza un forno pa kima sushi (incinerator). Esaki lo a cuminsa traha for di comienso di e luna aki, asina e minister y tambe e gerente Serlimar a priminti. Pero esaki no a sosode pasobra e forno ta den e fase di test ainda, e abogado di gobierno ta splica den corte. Den e forno lo kima sushi di yerba, kadaver y sushi medico. Esey ta mas o menos 13% di tur e sushi.
Pero habitante Balentina ta warda e forno cu miedo. Pasobra esaki ta para cerca di e dump na Parkietenbos, kiermen den su bario atrobe. “Como habitante nos no sa nada di esaki. Pasobra no a duna un permiso di molester pa asina envolvi nos como habitante den e proceso. Kico di esaki lo bay den aire atrobe?”
| Boet di miyones E minister Arubano Otmar Oduber aña pasa october ainda a referi na e caso den korte tocante molester di dump cu habitantenan di Sint-Maarten a gana. Gobierno ey mester bin cu un plan lihe sino nan ta haya un boet di miyones. Aruba mester evita algo asina, segun e minister di medio ambiente aki. |
No tin permiso
E abogado ta reconoce ainda ta tratando e permiso obligatorio di molester . Pero e ta bisa cu ta te aki 3 te 4 luna lo cuminsa uza e forno. E forno ta un modelo Ingles segun e ultimo tecnicanan y ta cumpli cu norma Europeo, e ta splica.Con esakinan ta aplicabel pa e situacion Arubano y con lo controla esaki, esey no ta cla.
Den corte ta bira cla si cu pa gobierno te awor regla y ley cu ta proteha salud y otro derecho di ciudadano no ta conta mucho. Pasobra e dump ‘nobo’ di Ser’i Teishi cu a menciona anteriormente tampoco no tin e permiso obligatorio di molester. Y e dump di casi 70 aña bieu Parkietenbos tambe te ainda ta sin permiso.