Portrèt: KPA

ORANJESTAD – Polis a arestá periodista Sharina Henriquez di Ret Karibense djadumingu anochi banda di mitar di dies na Aruba, pasobra e tabata trahando riba kaya durante e toke de keda. Tambe e periodista a haña un but di mil florin (516 euro).

“Apsurdo i crazy”, Wensly Francisco, miembro di direktiva di Nederlandse Vereniging van Journalisten (NVJ, Asosiashon Hulandes di Periodista) ta reakshoná. “Mésora ora ku mi a tende mi a tuma kontakto ku parlamentario na Hulanda.”Entretantu SP i GroenLinks a hasi pregunta den Kamer por eskrito

Esaki toke de keda na Aruba ta enserá

For di djasabra habitantenan di e isla no por ta riba kaya di 9 or di anochi te 6 or di mardugá. Ku e medida aki gobièrnu di Aruba ta spera di por kombatí plamamentu di e viro di corona.

Solamente trahadó di instansha i kompania vital si ta pèrmití di sali. Segun e promé minister arubano periodista no ta kai bou di esaki. Prensa arubano ta protestá kontra esaki i ta haña sosten di Asosiashon Hulandes di Periodista.

Henriquez ta apelá na e areglo den e desishon ministerial di Aruba pa ‘trabounan kontínuo’. Trahadó di e tipo di servisionan aki segun e dekreto ministerial si nan mustra un karta di nan dunadó di trabou sí nan por ta riba kaya durante toke de keda. “Pasobra notisia ta sigui 24 ora, bo por bisa ku periodista tambe ta kai bou di esaki”, Henriquez ta bisa.

Pero no opstante un karta di e dunadó di trabou i un deklarashon di Asosiashon Hulandes di Periodista (NVJ), tòg a sera Henriquez i el a haña un but di mil florin (516 euro).

“Ta bergonsoso i inkomprendibel ku outoridatnan na Aruba no ta mira kobertura di notisia komo un trabou vital i ku nan ta arestá nos periodista miéntras e tabata trahando su trabou di informá pueblo tokante e konsekuenshanan di e krísis di corona den e parti aki di nos Reino”, ta e reakshon di Frans Jennekens, redaktor hefe di Ret Karibense.

Karta urgente pa promé minister di Aruba
E Asosiashon Hulandes di Periodista (NVJ) djasabra kaba a manda un karta urgente pa promé minister Evelyn Wever-Croes di Aruba ku e petishon enfátiko ‘pa laga e posishon di eksepshon di media aun, i riba e término di mas kòrtiku, drenta na vigor den e dekreto’. Ainda e promé minister no a reakshoná riba e karta.

“Ta tristu ku nos mester aktua asina pasobra bon mirá esaki lo mester ta reglá normalmente for di polítika mes”, Francisco ta bisa. “Nos deseo ta pa konsiderá periodismo na e islanan meskos ku na Hulanda komo un di e profeshonnan vital. I no ku periodismo ta keda solamente den man di outoridatnan, manera aktualmente ta sosodiendo na Aruba. Nos no ta biba den un estado di polis.”

Prekupashon pa libertat di prensa na Kòrsou tambe
No ta na Aruba so segun Francisco kos ta bayendo malu si ta trata di libertat di prensa, for di Kòrsou tambe e miembro di direktiva a haña notisia preokupante di periodista.

“Gobièrnu ta usa periodista espesialmente komo medio i bosero i ta opstruí nan si nan ke hasi pregunta krítiko òf papia ku spesialista”

P’esei Francisco na nòmber di NVJ a manda un karta tambe pa gobièrnu di Kòrsou kaminda ta insistí riba mantenshon di libertat di prensa.

NVJ awor pa e islanan tambe

Periodistanan na e islanan di Reino Hulandes no ta kai bou di e Asosiashon di Periodista Hulandes (NVJ). Na e islanan no tin un asosiashon manera esaki ku ta sali na interes di prensa.

P’esei e miembro di direktiva Wensley Francisco for di dia di su nombramentu komo miembro di direktiva fin di aña pasá ta aktivo pa hasi e periodistanan di e isla parti di NVJ.

Pasobra na e islanan no por haña un badge di prensa ofishal via un asosiashon di periodista NVJ na petishon ta ofresé badge di emergensia. For di djasabra a drenta sigur 12 petishon seka Francisco for di e islanan.