Portrèt: Elisa Koek

20 May 2020 | Elisa Koek

WILLEMSTAD – Laba man, tene distansha i digitalisá: e palabranan klave pa enseñansa den tempu di corona na Kòrsou. Despues di a sera dos luna, skolnan na e isla unu unu ta habri nan portanan. Pero, kon bo ta mantené e medidanan aki riba término largu? “Bo no por”, Maghalie van der Bunt-George, presidente di Asosiashon di Enseñansa Protestant Kristian (VPCO) ta bisa.

“Ku e medionan ku nos tin aktualmente, ta apsolutamente imposibel pa mantené esaki”, Van der Bunt-George ta bisa. “Dos meter di distansha ta pone ku nos mester parti e klasnan na tres i ku nos mester di tres bia mas tantu espasio i tres bia mas tantu dosente. Ademas: aktualmente nos no tin ni sèn mes pa paga e resibu di koriente.”

Mester di un norma nobo
Promé minister Eugene Rhuggenaath ku aktualmente ta enkargá ku e funshon di Minister di Enseñansa tambe, ta bisa ku mester pone un norma nobo pa skol supsidiá. Riba término kòrtiku e areglo di dos meter ta na vigor, pero riba término largu mester mehorá higiena i digitalisashon. Mester kalkulá kuantu sèn skolnan ta haña pa esaki.

Higiena defisiente i digitalisashon

Na 2019 diferente direktiva di skol a notifiká kaba. Muchu poko bùdjèt pa seguridat na skol manera limpiesa i falta di digitalisashon tabata e puntonan pa kua nan a bati alarma.

E protokòlnan rònt di COVID-19 awor ta mas severo: mester keda mantené  higiena estrikto i por lo pronto e distansha entre dos alumno mester ta dos meter. Tambe ta aspirá pa mas digitalisashon.

Segun Ace Suares, ku pa añanan kaba ta empeñá pa digitalisashon den enseñansa via e proyekto Nos ta Konektá, esaki ta enserá hopi trabou. Mayoria mucha no tin un laptop ainda sino un tablet òf un selular. Ademas mester train e dosentenan tambe i nan tambe mester tin un laptop. “Nos a yega di presupuestá 19 mion florin pa un aña i 8 mion di esaki tabata pa laptop: sobra tabata trata di infrastruktura na skolnan. Si bo ke hasi esaki pa e añanan binidero, bisa ocho aña, esaki lo kosta 100 mion sigur.”

E promé minister di Kòrsou ta bisa ku a start un enkuesta pa haña sa kuantu mucha no tin akseso na medionan digital. Ta aspirá pa pèrkurá pa nan tambe haña esaki.

Bou di e kondishonnan aki skolnan na Kòrsou por habri atrobe
  • Skol sekundario por habri for di 18 di mei pa alumno di èksamen.
  • E skolnan mester pèrkurá pa e alumnonan mas bieu ku 12 aña tene dos meter di distansha di otro pa asina por pone ménos mesa den e klas. Tin bia diesdos na lugá di trinta.
  • Ki dia e otro alumnonan di skol sekundario por bai skol atrobe no ta konosí. Esaki no ta parse posibel tampoko ku e regla di 2 meter.
  • Ta konsehá pa aktualmente duna lès digitalmente mas tantu posibel.
  • Skolnan básiko lo por habri entrante 18 di mei, pero siman pasá a bisa ku tur skol básiko por habri te 1 di yüni.
  • Skolnan privá si a habri kaba, tin di nan for di 11 di mei
  • Tur skol lo haña un bishita di inspekshon promé ku nan por habri.