AMSTERDAM – Kon ta posibel ku un pintura di Rembrandt por hasi un impreshon asina grandi riba bo bida i identidat? Ta un pregunta ku ta okupá Layzimena Emerencia (23) di Aruba. “E kultura afro-karibense ta masha ousente na Aruba.”
Kasi diariamente Layzimena tabata pasa Rembrandthuis na Amsterdam pa bai su estudio hbo di Dosente di Baile. “Seis aña largu esaki no a atraé mi, miéntras turista ta bini djaleu pa e pinturanan ei. Pero di repente mi a mira un hòmber pretu riba un banner grandi pafó di e museo.”
Kiko ta ‘masha spesial’ na esaki? “Ora bo pensa riba e pinturanan di Siglo di Oro semper ta trata di hende blanku ku a pinta bunita i orguyoso. Hende pretu? Nan tabata sinta den un huki i ta pinta nan komo sumiso.”
Via WeConnect, un fundashon ku ta sali pa interes di studiante karibense, el a haña un bishita ku guia di e eksposishon. “Un kos a pasa ku mi ora mi tabata kompletamente mi so den e sala. Unda ku mi a bira henter ora mi tabata mira hende pretu pintá, orguyoso i bistí na paña masha bunita. A pinta nan mésun importante ku e hendenan blanku riku.”
Loke a toka mi tabata sierto ekspreshon di kara, e manera orguyoso ku nan tabata mirá mi. Tabata manera ta den un spil mi tabata wak, pasobra mi tabata mira mi mes tambe un tiki. Ku mi koló tambe ta skur”
Kompará ku Kòrsou Aruba mas parti tin hende koló kla. “P’esei ei tin e idea i e orguyo ku nos tur ta desendiente di e habitantenan original indígeno. Ma no ta nos tur t’asina. Ta ignorá e pasado di sklabitut.”
“Mi mes tambe tin bia no tabata sinti mi arubano pa motibu di mi koló”, Layzmina ta konta. “Mi ta bini di San Nicolas. Ta un bario riku na kultura i kaminda tin hopi hende kolo skur ta biba. En general ta konsiderá e bario komo atrasá. I esei ta henter e kos.”
“Ta mira henter San Nicolas komo un tipo di ghetto, ‘the chocolate city, kaminda ta minoria so ta biba. Tin un otro stigma ku e hendenan pretu di Aruba ta bini di otro isla, manera Sint-Maarten. Ke men bon mirá ta serka ken bo ta pertenesé?
Kasi tur hende ku outoridat na Aruba ta koló kla, manera nos héroe di pueblo Betico Croes. Na skol nos ta siña di Tula i sklabitut na Kòrsou pero no tokante kiko a sosodé na Aruba. No ta straño ku mi mes tata mas despues a bini sa ku tin un historia di sklabitut na Aruba i tambe tin registronan di esklabo.
Bèk pa e obranan di arte di Rembrandt. “Un pintura di un muhé pretu orguyoso ta toka mi, pasobra mi ta bira mas konsiente di e manera ku mi ta komportá. Mi no sa eksaktamente pakiko, pero tin algu ku ta pone nos arubanonan pensa inkonsientemente ku hulandesnan sa mihó. Den kompania semper ta nan ta na palabra i e ora ei mi no por ekspresá mi mes bon. E ora ei mi ta skohe pa sera mi boka.”
‘Pakiko e kultura afrokaribense ta asina ousente na Aruba?’
“Despues di e bishita na e eksposishon algun mucha muhé a bisa: Na Kòrsou hopi bia nos ta bai eksposishon na museo ku skol òf ora tin siman di kultura. Mi a pensa den mi mes, nos na Aruba ta anda henteramente diferente ku nos kultura. Nan ta bai hopi mas leu. Lo mi tabata ke pa nos muchanan siña mas den enseñansa tokante nos historia i kultura, ku tin hende pretu tambe.”
Lo mi tin gana di kòmbersá ku e minister na Aruba. Bo ta bira mas sigur di bo mes si bo sa ken bo ta i si bo tin e sintimentu ku bo ta konta. Si nos desaroyá arte i kultura mas aleu na Aruba, nos ta yega mas leu.”
“Mi mes ta para kla pa duna un kontribushon na esaki na Aruba. P’esei mi ta hasi e pregunta: Pakiko e kultura afro-karibense ta asina ousente na Aruba? Kiko esaki ta bisa di Aruba?
Dosente di baile Layzmina Emerencia (23) di Aruba. Foto: NTR/John Samson