Portrèt: Kim Hendriksen

WILLEMSTAD – E lansamentu di e Registro di Esklabo ta yena un bashí grandi den e historia di sklabitut di Kòrsou, awor ku tur hende por buska nan antepasadonan online. Asina Frank Quirindongo, presidente di e Plataforma di Sklabitut i e Herensia di Sklabitut, ta bisa. “Ta te ora numa bo konosé bo pasado, bo por komprondé bo mes.”

Riba 17 di ougùstùs 2020, eksaktamente 225 aña despues ku e rebelion grandi di esklabo bou di guia di e luchadó di resistensia Tula a kuminsá, a publiká ocho registro di esklabo online. Archivo Nashonal a pone e archivonan digital disponibel riba nan website. E archivo ta kontené 21 mil registrashon for di 1839.

Video: Kim Hendriksen

E Registro di Esklabo no ta kompleto ainda. Segun Quirindongo ainda mester inkorporá e temporada di promé di yüli 1863, despues di sklabitut. “E ora ei nos por investigá kiko a sosodé ku e esklabonan liberá. Kuantu a bai Willemstad òf a keda na plantashi i kon despues nan a biba i traha.”

Laso di famia

Segun historiadó Jeanne Henriquez e buskamentu den e registronan por pone ku famia ta sera konosí ku otro pa promé bia. E interes di mas grandi Henriquez tin pa e bukinan di genealogia (famia). E bukinan aki ta ilustrá e mesklamentu di e diferente famianan.

E archivonan bieu, ku originalmente tabata skibí na man den diferente buki, entre otro ta indiká ken a muri promé ku 1863 i ken a hui. Henriquez: “E ocho registronan ta indiká tambe kuantu generashon a keda na un plantashi. Awor ku e archivo aki ta online, ta mas fásil pa verifiká informashon.”

Proyekto Sablika

Max Scriwanek, direktor di archivo nashonal. ta bisa ku lo ampliá e Registro di Esklabo i ku lo sigui un eksposishon tambe. Pa e proyekto aki e investigadónan – sientífiko, antropólogo, arkeólogo i historiadó – a skohe e nòmber Sablika. Sablika tabata e supuesto amiga di e luchadó di resistensia Tula.

Quirindongo i Henriquez komo investigadó sa di konsultá e archivo online. Pa hasi e Registro di Esklabo aksesibel pa tur hende, pronto Archivo Nashonal lo duna kurso online tokante kon mester buska den e database.