WILLEMSTAD – Gobièrnu di Kòrsou a logra ‘un resultado balansá’ ku Hulanda tokante e kondishonnan ku Hulanda ta pone na e dunamentu di fiansa di corona. E triunfonan di mas importante pa Kòrsou: e Entidat di Reformashon Karibense (CHE, Caribische Hervormingsentiteit) ta haña ménos poder i e meta ta no solamente ekonomisashon, sino tambe invertí den desaroyo.
Esaki a sali for di e karta di promé minister Eugene Rhuggenaath den kua e ta informá parlamento tokante e resultadonan di e negosiashonnan ku Hulanda. Tabata trata espesialmente di e outorisashonnan ku Hulanda ker a duna CHE. Esaki tabata un daño grandi pa outonomia pasobra tantu gobièrnu komo parlamento no ta partisipá mas, asina gobièrnu di Kòrsou a konkluí. Pero den e proposishon nobo esaki a kambia, asina a resultá awor.
“No tin tumamentu ofer di outorisashon legislativo i gubernamental. E intenshon ta pa e entidat traha pa i ku Kòrsou, a premirá ku lo deliberá hopi ku gobièrnu di Kòrsou.”segun Rhuggenaath.
No solamente reformashon
Esaki ke men ku e reformashonnan pa kua mester di lei i regla nobo, promé mester haña lus bèrdè di parlamento di Kòrsou. Un otro viktoria importante ta ku e énfasis no ta solamente riba reformashon (sino riba ekonomisá tambe). Hulanda lo ko-invertí den ekonomia di e isla, entre otro den bon enseñansa i kuido aksesibel, segun Rhuggenaath. “Hulanda a komprometé su mes enfátikamente na esaki”
Ke men e entidat por saka e sèn di e fiansanan di corona na proyekto i programa kontal ku esakinan no afektá e poder di e órganonan gubernamental kurasoleño. Ademas e direktiva lo no konsistí di solamente hulandes ku ministerio di Asuntunan Interior i Relashonnan den Reino ta skohe. E nombramentu di un di e tres miembronan di direktiva aworó lo sosodé den deliberashon ku e promé minister kurasoleño.
Pa asina e direktiva di e entidat ta ‘representativo pa Kòrsou i tin afinidat ku e parti karibense di Reino’, segun Rhuggenaath.
Otro nòmber: OHO
Den henter e karta e promé minister ta papia di ‘Órgano di Reformashon i Desaroyo’ na lugá di CHE. Minister Steven Martina a konfirmá esaki ayera nochi. “Si, CHE a bira OHO i tin basta kambio.”
E ekspektativa ta ku gobièrnu di Kòrsou ta firma e akuerdo polítiko rápidamente ku Hulanda. Pa despues e proposishon mester bai Konseho di Estado pa konseho tambe ainda. I despues ta parlamento di Kòrsou ta na turno.
Pasobra Staten ainda por rechasá e lei di konsenso di Reino den kua e entidat ta regla. Pero asina ku a firma e akuerdo polítiko, nos ta kuminsá kaba ku e preparashonnan, segun Rhuggenaath.
Ademas a palabrá ku e lei lo terminá mas trempan, for di despues di seis aña kaba. I despues di tres aña tin un evaluashon di un komishon independiente. Si Kòrsou i Hulanda tur dos bai di akuerdo por kanselá e lei i e entidat mas promé tambe.
Akshon di firma
potrèt: Dulce Koopman
Último dianan atrobe tabatin protesta kontra e aktitut di Hulanda. E movimento di hende muhé Seda i e sindikatonan a kolekta firma pa un petishon na Nashonnan Uní. Ku esaki nan ke pa Kòrsou bini riba e lista atrobe di pais kolonisá. Pasobra ta asina e aktivistanan kurasoleño ta mira ku e relashon ku Hulanda a bira.
Presidente di Seda Myrtha-Leetz Cijntje a ripará sí ku espesialmente esnan grandi di edat ta okupá ku futuro di outonomia di Kòrsou.
“E hóbennan ta muchu okupá ku e kambionan i ainda no ta pensa riba loke a pasa den pasado i despues. Mester siña nan esaki na skol òf den workshop.”