WILLEMSTAD – Sektor empresarial a pèrdè algun mion florin durante dje dianan di interupshon di koriente na Kòrsou. Esei Kamara di Komersio ta konstatá preliminarmente. Aqualectra mientrastantu ta splika ku ainda e situashon ta delikado i ku ta e sistema di protekshon ta okashoná e problema.
Esaki a kondusí na e dos último interupshonnan serio, di kua esun di djabièrnè a dura mas ku 26 ora. En total den 1 siman Kòrsou a sufri mas di 40 ora di black out, riba djaluna, djaweps i djasabra último. E promé black out, segun e splikashon di Aqualectra tabata debí na Covid- 19. Tin vários empleado malu òf den karentena loke ku ta difikultá mantenshon dje ekiponan.
Neysa Isenia, hefe Finansiero di Aqualectra ta splika: Aqualectra ta produsí koriente na 66 kilovolt. Ora ku e yega na un kas e ta 12 kilovolt. Den ret ta transformá e koriente di 66 pa 30 kilovolt- tin kliente grandi ku ta kumpra riba 30 kilovolt- i despues e ta sigui bah’é na 12 kilovolt. Ora ku tabata produsiendo e koriente, e tabata drenta ret, na voltahenan muchu mas haltu ku 66.
E mashin ta haña e mensahe ku e mester bai traha mas duru. Na su turno e sistema di protekshon ta aktivá i ta paga e mashinnan, pa evitá ku nan no ta drei demasiado duru i ta kibra. Segun Neysa esei tabata e liña kòrá dje problema.
Aqualectra no sa kiko a pasa ku e voltahe ta deregulá ku ta pone e sistema di protekshon aktivá, paga e mashinnan i okashoná e black out. Pa por determiná esaki, tantu Aqualectra komo gobièrnu -imparsialmente – a kuminsá un investigashon.
Neysa Isenia ta kontestá e pregunta si por ta trata di un òf otro forma di bòikòt.
Minister Steven Martina, enkargá ku Aqualectra a bisa djaluna durante un konferensha di prensa, ku el a instruí Aqualectra pa strukturalmente introdusí un maneho di kompensashon. Den e kaso dje último interupshonnan di koriente, esei ta nifiká ku lo por duna un asina yamá “tegemoetkoming” pa e inkonbeniensia ku e interupshon di koriente a kousa. Tambe Aqualectra mester fasilitá e dunamentu di informashon relashoná ku e dunamentu di daño di perhuisio pa motibu ku koriente a kai afó.
E komersiantenan ku a pèrdè hopi sèn den e dianan aki debí na e black out, solamente no por spera muchu kos. E kompensashon lo ta prinsipalmente relashoná ku ekiponan ku a daña. Segun Billy Jonckheer, presidente di Kàmara di Komèrsio, apesar ku e kantidat di interupshon di koriente na Kòrsou último tempu a baha hopi, e tres dianan di black out ta un situashon hopi dramátiko.
Billy Jonckheer
Kámara di Komèrsio no ta kere ku ta posibel pa tin un di dos kompania di utilidat banda di Aqualectra. “Nos komunidat ta hopi chikí i ta hopi difísil pa tin dos kompania ku ta hasi meskos”. Loke ku mester sosodé ta mester kuminsá hasi uso mas tantu posibel di energia alternativo, entre otro panel di solo i usa bientu. Billy Jonckheer:” Monopolio ta un kos ku ta nos no ta di akuerdo kuné. Nos ta kere den un merkado habrí, pero e ta difísil pa haňa kompetidornan den un merkado asina chikí, ku ta bai hasi e invershonnan kuantioso, pa por sirbi komunidat ku koriente.”
Eks presidente komisario di Aqualectra Ruben Suriel i miembro di Fundashon Akshon Sivil, ku a hasi un enkuesta sivil di Aqualectra, no tin konfiansa den un investigashon ophetivo na Aqualectra.
Nada no a kambia
Ruben Suriel tabata presidente komisario di 2006 pa 2007. For di e tempu aki tabatin hopi problema na Aqualectra, ku ta resultando den entre otro e interupshonnan serio di koriente awendia.
Billy Jonckheer
Segun Suriel, di un manera òf otro, mester buska un hende independiente pa saka tur e hendenan ku historia den Aqualectra. E ta konvensí ku e hendenan ei mester bandoná Aqualectra pasobra nan no a siña di nan fayonan.