KRALENDIJK – “Sea fuerte, tuma un posishon i bisa Hulanda ku nan mester yuda”, segun Nochi Willems di sindikato USIBO durante e reunion urgente di konseho insular tokante e kompania di almasenahe di zeta Bopec.
Personal a bini pa protestá atrobe. Kuminsamentu di e luna aki tambe nan a hasi esaki. E ora ei Gabriel Pourier di e sindikato BPWU a bisa ku kasi no tabata bini sosten di gobièrnu. Gezaghèber di Boneiru ta refutá esaki. “Mi tin añanan largu ta yuda Bopec tras di kortina pero esaki ta un situashon kompliká.”
Outor Marit Severijnse en Nathaly Evertsz-Ipcedencia
Willems ta konfirmá ku danki na entre otro gezaghèber a logra pa paga e empleadonan te desèmber. E echo ku ta papia tokante esaki den reunion di Konseho Insular e ta konsiderá komo madures di e polítika di Boneiru. “Awe Konseho Insular ta mustra ku nan ta representá pueblo i no solamente nan partido.”
Yudansa di Hulanda
E personal di Bopec ya tin dos luna sin haña salario pero awor nan por konta ku yudansa di gobièrnu. Pero pa mayoria di e kolaboradónan aki e sosten di gobièrnu aki no ta sufisiente. Ta rekompensá gastu di internet, kabel, akohida di mucha i awa, koriente i gas pa dos luna. “I di kiko mi tin ku kome?”, kolaboradó Elvis Soliana ta puntra su mes?
“Nos ke pa gobièrnu empeñá pa rekompensá e kolaboradónan ku 80 porshento di nan salario”, Willems ta bisa. E ta haña ku si ta nesesario Hulanda mester yuda finansieramente. “Kon ku bai bini nos tambe ta parti di Hulanda.”
Diputado Nina Den Heyer ta komprondé e petishon pa mas sèn. “Gustosamente nos ke yuda pero no lubidá ku tin mas kompania den problema. Lo nifiká un un areglo eventual lo mester konta pa tur hende.”
Kaso sumario
Riba 5 di mart tin un kaso sumario na Bopec, entamá pa e sindikatonan. Gerard Bernabela di sindikato Fedebon ta bisa ku si e sindikatonan gana esaki, nan ta bira un di e kreditornan i por pone beslag riba e kompania di almasenahe. Pero si e personal e ora ei lo haña pago lihé, esei ta keda e pregunta.
Entretantu kasi tur kolaboradó a tuma un aktitut di ‘no pay, no work’ i ke men ku apénas ta traha. Pero ku un kantidat insufisiente di personal, e seguridat di Bopec ta sufri.