WILLEMSTAD – E pandemia di Covid-19, kompañá pa e lockdown ku Kòrsou a konosí, tabatin su influensia grandi riba henter komunidat. Tambe riba mundu di kultura.
Na un banda e pandemia a stimulá eksportashon di arte lokal. Made in Curacao ta un plataforma ku su miembronan ta traha independiente. Den e pandemia di Covid-19 tin un grupo ku a desaroyá positivamente pasobra nan ta traha online. Di e otro banda, pa e grupo di artista ku ta bende prinsipalmente riba merkado, lockdown a hasi nan funshonamentu mas difísil. Ret Karibense a papia ku diferente artistanan.
‘Vários di su miembronan a stòp di traha durante di e pandemia’- Charella Riedel
Charella Riedel, kende ta na kabes di Made in Curacao: “No ta tur hende ta deseá òf por traha online. Banda di esei, no ta tur hende ta dispone di kòmpiuter, telefòn i internèt ni tampoko ta dispone di e konosementu. Un otro aspekto ku mester tene kuenta kuné, ta ku klientenan ke mira i mishi ku e produktonan promé ku nan kumpra un obra di arte. Made In Curacao ta konstatá ku vários di su miembronan a stòp di traha durante di e pandemia. Pero tambe tin artista ku a adaptá loke nan ta produsí hasi pa tòg generá entrada.”
Nan a kambia nan produkto, pa produktonan ku por usa den e pandemia. Por ehèmpel nan ta traha pasaboka i produktonan di higiena, segun Riedel.
Sosten finansiero
Vários artista a pidi sosten finansiero serka gobièrnu. Atministrashon ta importante loke ku tin bia tabata problema pa bin na remarke pa haña e sosten di gobièrnu.
Charella Riedel riba e merkado nobo
‘Landhuis Bloemhof ta sigui buska manera nobo pa funshoná’ – Elodie Heloise
Pa Landhuis Bloemhof, ku ta fungi komo un sentro pa arte, e desaroyo digital tambe a bira un faktor importante den lockdown. Elodie Heloise, ku ta na kabes di e tim ku ta manehá Landhuis Bloemhof ta splika:
“Durante dje promé lockdown Landhuis Bloemhof a pasa den training pa determiná kon e por funshoná online.” Durante dje dos lockdown, Landhuis Bloemhof a kontinuá ku su aktividatnan online. Entre otro Landhuis Bloemhof a organisá un fundraising online pa Ronald Mac Donald House of Charities, ku a pèrkurá pa kuminda pa personal di CMC ku tabata hopi okupá debí na e ola grandi di pashèntnan di Covid-19 den e hospital. E rekoudashon di fondo virtual a haña hopi akohida.
Pa loke ta trata futuro, banda di e aspekto digital, Landhuis Bloemhof ta sigui buska manera nobo pa funshoná. Pero esaki ta dependé dje reglanan ku na e momentu ei ta vigente, segun Heloise.
Elodie Heloise riba adaptashon (na hulandes)
Landhuis Bloemhof no tin miedu ku e interes dje bishitantenan lo baha despues di lockdown. ‘‘Nos a mira ku despues di un lockdown, e hendenan ta kontentu ku nan por bishita nos atrobe.’’
Mas entrada
Tin indikashon ku lockdown aña pasá no a afektá e kompra di obranan di arte. Ta parse ku tin hendenan ku obligatoriamente mester a keda kas, a invertí den arte. Plaka di entrada ku bishitantenan mester generá pa Landhuis Bloemhof, si a kai atras, asina Heloise ta splika.
Heloise riba invershon den arte (na hulandes)
‘Ni e arte ni tampoko e otro entrada ta fio’-Lusette Verboom
Un periodo hopi difísil finansieramente pasobra pero ku tòg no ta kondusí na negativismo. Asina Lusette Verboom, di Galeria Alma Blou, ta deskribí e lockdown. Verboom ta usa e tempu aki pa konsentrá riba su aktividatnan internashonal.
Heloise riba invershon den arte (na hulandes)
Verboom ta splika tambe ku mayoria artista no ta biba solamente di nan arte.”Nan tin un entrada banda di nan arte. Pero ni e arte ni tampoko e otro entrada ta fio.”
Tòg e artista ku ta pasando den un periodo difísil, ta eksperensi’é komo un tempu di stimulashon i kreatividat, Verboom ta konklui.