WILLEMSTAD – Manera dos mucha di skol nan tabata bria: Raymond Knops i Gilmar ‘Pik’ Pisas. E sekretario di estado hulandes i e promé minister kurasoleño djaluna mainta durante un rueda di prensa a konta di e wega di futbòl ku nan a hunga e dia anterior. Knops tabata tenta Pisas papiando di ‘un mitar skeinbewé’ ku el a mira e polítiko kurpa haltu hasi. Pisas a bisa ku Knops tabata mihó di loke el a pensa. ‘Mi tabatin henter un otro idea di dje. Pero awor ku nos a pasa parti di un dia huntu ku otro, mi mester bisa: E ta bon gai.’
Wikènt pasá Knops a bishitá Kòrsou pa promé bia for di dia ku gobièrnu Pisas a drenta den funshon riba 14 di yüni. Banda di negoshá i reuní tambe tabatin espasio pa relahá. Djadumingu mainta Pisas a hiba Knops bai keiru rònt Bándabou, e parti wèst di Kòrsou. Ta e área kaminda Pisas a lanta, kaminda ainda e ta biba i ta orguyoso di dje.
Serbes
Lihé mes a sali potrèt alegre di nan dos riba medionan sosial. Hopi kara ta hari, tambe un potrèt ku serbes den man i naturalmente e wega di futbòl kaminda nan dos a partisipá na un parti di e torneo ku dos tim ku tabata hunga kontra otro. Segun Knops Bándabou tabata pon’e kòrda e komunidat chikí kaminda e mes a lanta. ‘Masha hopi sentido di komunidat.’ Tokante e torneo Knops a bisa ku un sonrisa: ‘E kalidatnan atakadó di señor Pisas kontra mi kalidatnan defensivo a resultá den un empate.’
Pa loke ta kontenido polítiko tambe ta manera nan dos ta di akuerdo. I esei pa hopi hende na Kòrsou ta un sorpresa. E partido MFK di Pisas tabata hiba kampaña kontra e akuerdo ku e gobièrnu anterior a sera ku Hulanda tokante e lantamentu di un Órgano Karibense pa Reformashon i Desaroyo (COHO). Pero segun tantu Pisas komo Knops tur dos pais awor tòg ta mira e nesesidat di un órgano asina. Esei tin di hasi tambe ku e situashon finansiero grave di Kòrsou.
Debe
Segun minister di Finansa Javier Silvania tabatin 80 mion Naf riba e kuenta dia ku gobièrnu a drenta den funshon riba 14 di yüni. Mas lat e luna ei a bini 80 mion Naf aserka na entrada. E gastunan a resultá di ta 170 mion Naf. Loke a konfrontá e gobièrnu nobo den e promé luna kaba ku un debe riba e kuenta koriente. Segun Silvania esaki por subi te mas ku mei bion na fin di aña. Banda di esaki e pais tin un debe públiko haltu.
For di siman pasá Kòrsou ta kumpli ku e kondishonnan pa un fiansa nobo di 168 mion Naf di Hulanda. Tokante esaki Knops a bisa djaluna pasá: ‘E ta mustra bon, pero nos ta warda un karta ainda di gobièrnu Pisas den kua ofishalmente ta menshoná ku e isla ta kumpli ku e kondishonnan pa kita 25 porshento di e kondishonnan laboral di minister i parlamentario’. Riba promé di yüli un reunion parlamentario a tuma lugá tokante esaki i Konseho di Minister tambe a komprometé su mes na e palabrashonnan.
Deliberashon
Pero banda di e 168 mion Naf ainda mester di mas sèn. Segun minister Silvania Kòrsou mester sòru pa esaki drenta di bèrdat. Tokante esaki ta deliberá aktualmente ku Hulanda. Segun gobièrnu di Kòrsou e negosiashonnan ta venturoso. Knops mes a bai un tiki mas leu djaluna pasá: El a mustra ‘positivo i optimista’ i ta ferwagt ku lo alkansá un resultado positivo rápidamente.