WILLEMSTAD – E guera na Ukraina no ta dominá e notisianan diario ni e polítika na Kòrsou. Riba kaya sí hende ta ekspresá nan prekupashonnan i nan kombibensia. Espesialmente den orashon tin atenshon pa e situashon i e víktimanan.
Reportahe di Joelle Jochems (na hulandes)
Akshonnan grandi di kolektá, manera akshon 555 na Hulanda no tin na e isla. E apelashonnan ku tin pues ta espesialmente pa sosten spiritual. Wikènt pasá tabatin un konsierto di gospel na Brionplein pa gradisí Dios i diferente pastor a subi podio. A resa pa e isla, pa e logronan, pa pueblo i espesialmente pa e echo ku aki no tin guera.
Manera un di e bishitantenan a bisa: “Nos no por hasi nada na tur e inhustisia na mundu òf na e echo ku tin víktima di violensia di guera. E úniko ku nos por hasi ta pensa riba nan.”
‘Sanshon ta toka Kòrsou i Sint Maarten tambe’
Banko Sentral di Kòrsou i Sint Maarten a laga sa ku e sanshonnan kontra Rusia ta toka Kòrsou i Sint Maarten tambe. Ounke apénas tin laso finansiero i ekonómiko ku Rusia. E islanan karibense ta haña nan ku un inflashon mas haltu sí i ménos hende ku ta bini di vakashon.
Banko Sentral ademas ta apelá na tur instansha ku ta kai bou di su responsabilidat pa regularmente keda sigui e desaroyonan nobo tokante e sanshonnan, manera riba e website di Union Oropeo. Algun transakshon i aktividat legal ku ta kai bou di e lista di sanshonnan di otro pais, ademas por tin konsekuensha pa e maneho internashonal di bankonan na Kòrsou i Sint Maarten, segun banko Sentral.
No tin motibu pa pániko
For di polítika tin tiki atenshon pa e guera. Partidonan di oposishon ke pa promé minister Gilmar Pisas komentá riba e situashon – manera su kolega arubano Evelyn Wever-Croes a hasi.
Pisas mes te awor solamente a bisa ku ‘ta sigui e situashon minusiosamente’. Pero ku segun e ‘no tin motibu pa pániko. ‘Gobièrnu ta vigilá e desaroyonan bon i regularmente tin deliberashon tokante e guera’, asina e promé minister ta trankilisá e pueblo.