KRALENDIJK – Minister Hugo de Jonge (Bibienda i Ordenamento Urbano) ta rekonosé e problema rònt di kas pagabel na Boneiru, pero ta haña ku mandatario lokal mes te aworakí a tuma muchu poko medida. Awor gabinete ke mira tur opshon pa ‘e boneriano komun’.
Segun hopi habitante i bishitante e isla a kambia na un manera negativo, pasobra lo a ‘yen’é’ ku vila i kas di vakashon. E bonerianonan mes tin mas difikultat pa haña un kas, pasobra e kasnan a bira hopi mas karu.
E minister ta hasi un yamada na polítika munisipal pa nan mes tambe tuma medida na Boneiru. “Bo ta i bo por ta doño riba bo mes isla, pero e ora ei bo mester hasi esaki sí”, De Jonge ta reakshoná kontra Ret Karibense.
‘Pone regla ku ta kla’
“Si por ehèmpel bo ta haña ku no mester pèrmití di kita kas for di e merkado di hür lokal, pa hür nan ku turista, anto traha e ordenansa di bibienda ei den kua bo ta djis regla esaki tambe”, minister De Jonge ta haña.
“Pone regla kla kiko bo ke pa konstruí. Si bo ta haña ku trinta porshento mester ta disponibel pa hür sosial, hasi esaki antó. Hasi palabrashon tokante esaki.”
‘Prioridat di gabinete ta den man di e boneriano komun’
E minister ta haña ku a bira tempu pa awor polítika bai ‘pèrkurá pa bo tei pa e boneriano komun’. “Un kas realmente ta e base di bo seguridat di eksistensia. I mi ta kere ku esaki den e área di kas pa biba aktualmente berdaderamente ta bou di preshon, ke men realmente esaki ta e promé prioridat.”
Segun De Jonge for di gabinete ta wak tur opshon (di nobo) pa konstruí i biba na e isla, manera mas kas di hür sosial, kas pagabel pa e entradanan entremedio, yuda korporashon di konstrukshon di kas i mihó posibilidat pa un hipotek.
Gabinete ta koregí e mandatarionan na Boneiru“E isla ta berdaderamente popular serka persona ku a bin biba Boneiru for di tempu ku na 2010 el a bira un munisipio ekstraordinario di Hulanda. I e no ta popular solamente pa bin pasa fakansi, sino tambe pa tin un kas ei.”, reportero polítiko John Samson ta konta. “Riba kaya i na fiesta regularmente bo ta tende remarkablemente hopi krítika ku e isla a bira un sorto di poseshon di e oropeonan. E dede akusadó basta lihé ta mustra riba Den Haag.” “Hende ta sensitivo sí pa esaki. Tantu serka gabinete komo serka miembro di parlamento hulandes bo ta tende òf ripará ku nan ke ta poko reservá ku dunamentu di regla, sino for di e islanan nan ta haña e akusashon di ‘komportashon kolonial’. Un problema grandi ta ku hopi habitante ta sinti nan mes tené atras kompará ku munisipio na Hulanda Oropeo. No ta mas regla nan ta warda sino mas derecho sí.” “P’esei ta remarkabel ku minister De Jonge awor den e konferensia di prensa ta koregí e mandatarionan boneriano, pasobra nan mes lo a hasi muchu poko den e área di kas pa biba. E ta haña ku a bira tempu pa gabinete awor sí intervení pa yuda e boneriano komun haña un kas. Awor e minister ta pone tur opshon riba mesa. Pero atrobe bo ta tende esun nota marginal: esaki mester ta den koperashon sí ku e mandatarionan lokal.” |
Amsterdam
Na Hulanda Oropeo por ehèmpel Amsterdam a establesé un deber di biba pa kumpradó nobo di kas. E munisipio ke evitá pa hende ku sèn kumpra kas pa gana sèn kuné.
Banda di esei nan a regulá AirBnb: ku un pèrmit bo por hür bo kas maksimalmente 30 dia pa aña ku turista. Bo mes mester biba aden i bo mester mèldu na munisipio delantá. Si bo no tene bo na e reglanan bo por haña un but: entre 8.700 i 21.750 euro.
Gabinete ke ta mas na e islanan
Minister De Jonge e siman aki pa promé bia a hasi un bishita di trabou na e tres munisipionan karibense Saba, Sint Eustatius i Boneiru. Esaki el a hasi huntu ku sekretario di estado Alexandra van Huffelen (Relashonnan den Reino i Digitalisashon).
Gabinete ke tei mas tantu na e islanan, pa asina espesialmente papia ku e habitantenan envolví mes tokante nan problemanan i deseonan. “Si bo no t’aki bo no ta mira kiko ta e esensia di e problemátika i bo no por tuma e pasonan ku ta masha nesesario”, Van Huffelen ta konta koresponsal Marit Severijnse.
Otro siman sekretario di estado Maarten van Ooien (Salubridat Públiko, Bienestar i Deporte) ta na Boneiru i Sint Eustatius pa papia tokante salubridat i violensia domestiko.