KÒRSOU – E bario ta karga e nòmber di un Seru di Fortuna, pero esei sigur e no ta. Aki ta reina desempleo, bo ta mira kasnan tur deteriorá i hopi ruína. Pa algun dia kaba, lider di bario Omar de Camps ta tur preokupá pa e siguridat di su kerido bisiñanan. Un tormenta tropikal ta biniendo, podisé e ta bira un orkan mes.
Bisa ken bo ke na Kòrsou ku ta na Ser’i Fortuna bo ta bayendo. Chèns ta grandi ku hende ta keda wak bo manera ta kèns mes b’a bira. Ta un bario infamoso, band’i airopuerto Hato aya, kaminda e hende nan preokupashon ta grandi. Hopi di nan ta sinti ku polítika a laga nan na kaya, nan no sa sigui notisia mashá, ta loke bo ta tende ora bo papia ku e habitantenan mes.
Ta djadumingu, pero pa Omar de Camps no e djadumingu dushi ku e sa pasa. Ku apenas tres o kuater dia prome ku tormenta tropikal o orkan Bonnie yega Kòrsou, ya kaba e ta konkluí ku gobernashon di e país ta ‘lat’ ku akshon. “Paso no tin un indikashon ku tur hende a haña e notisia ku ta bini un tormenta pa nan prepará. Hopi preokupante.”
Nan a strep e skol: ‘Tur kos di balor nan a bai ku ne’
Hopi kas den e bario aki ta deteriorá. Por ehèmpel: bentananan ku kasi no por sera mes. Tin bibienda deteriorá tambe ku ta di gobièrnu.
Mas e lider di bario konta kiko ta su preokupashon, aún mas tristu e situashon ta pinta. “Tin hende ku promé ku pandemia mes, ya kaba nan tabata den un situashon di pobresa.” Pa hendenan ku ta den un sitashon di pobresa, tempu, sèn i ayudo ta konta mes mes ora un tormenta o orkan por ta biniendo.
Esaki tabata Kolegio Dodo Palm, ku a para bira ‘un ruína’, manera lider di bario Omar de Camps ta yam’é.
E ta mustra n’e sitio mei-mei di e bario, kaminda entretantu tin e skol ku ta tur bandoná. “Durante di pandemia ku hendenan no tabata tin trabou, a ‘sloop’ e skol pa kue kosnan ku ta di balor pa bende. Anto e or’ei a keda sobrá di skol. Esaki tabata Kolegio Dodo Palm, ku a bira un ruína.”
Ku muchanan tabata hunga akinan un tempu pasa, ta algu ku difisilmente bo por imaginá ora bo mira e skol. “A keda balkinan ku ta kologá, sobrá di dak, pida kosnan lòs. Tambe tin shushi. Hendenan a kuminsá dùmp mei-mei di bario den e skol.”
“Ku mal tempu pasa awor aki, manera un tormenta tropikal o orkan, e ta lanta tur e kosna’i. Nan ta bai kai riba dak o bora dak di hende. Kai riba outo di hende.”
“Ku tur konsekuensia ku tin. E por pasa bora bentana di hende. E ta di sumamente importansia pa gobièrnu hasi algu n’esei. E ta hopi preokupante. E situashon ta peligroso, peligroso.”
E bario ta situá riba un seru, ku ta kue hopi mas bientu
Ku e yegada di tormenta tropikal Bonnie, e presidente di sentro di bario di Ser’i Fortuna ta “sumamente preokupá” pa seguridat di su kerido residentenan. Sí, e bario aki ta diferente di sobrá di Kòrsou, e ta bisa. Anto e ta riba un seru, ku asina ta kue mas bientu.
Si bo wak p’aden di kas, bo ta mira kiko pobresa ta nifiká pa sierto hende den e bario di Ser’i Fortuna.
Ku e bario ta deteriorá, ta sigui fomentá e duele ku hopi hende tin na Ser’i Fortuna: ku polítika di Kòrsou pa ańanan kaba a lubidá riba nan. Si bo papia ku hendenan aki, bo ta ripará ku nan a pèrde speransa ku polítikonan lo bin yuda nan.
Pa De Camps, ta importante p’e sali na defensa di su hendenan di Ser’i Fortuna. “Habitantenan mester por protehá nan mes. Mi ke pa nan fasilitá esei di un manera o otro. E bario aki tambe ta forma parti di Kòrsou”, e ta bisa. “Pero manera mi ta mira aki, te ahinda mi no ta mira un seriedat di parti gobièrnu.”
Alertá hende hopi mas adelantá
“Normalmente gobièrnu ta emití boletinnan, pero te ahinda [djamingu] mi no ra mira nada di esei. Ora ku tin algu asina serio, bo ta tende hendenan den bario papia di dje.” E siman a kuminsá, sin ku e mensahe a yega. Esei kemen: e mensahe a yega lat, sigun e lider di bario.
Kiko habitantenan di Ser’i Fortuna ta hasi anto ora ku nan sa ku nan kas no por wanta un tormenta fuerte o un orkan? Esei ta dependé si e notifikashon yega hopi mas promé, De Camps ta splika.
“Nos ta biba riba un seru, ku ta manera aparte for di otro partinan di Kòrsou. Unda bo por skonde, ta kos ku gobièrnu tin ku indiká. E kos ta ku nan mester por yega ei na tempu tambe. Si bo no duna notifikashon trempan na unda mi ta bai shèlter, anto e or’ei nos ta keda den un situashon peligroso.”
“Mi ta mirando tur hende ta biba nan bida normal, sin e preokupashon ku tin un situashon serio”, De Camps ta bisa. “Ta na su lugá ku gobièrnu por brinda posibilidat; repartí tablanan di palu, klabu i tur e kosna’i pa asina habitantenan klaba bentana o hasi lo máksimo pa nan por protehá nan mes.”
Hopi hende ta klaba pafó i protehá nan bentana ku tabla di palu. E glasnan di e shùter no ta sera bon, di forma ku bientu fuerte di un tormenta o orkan ta forma un peliger p’e kas i p’e hendenan ku ta skondiendo paden.
Het plafond valt af. Er is amper geld voor elektriciteit, laat staan voor een nieuwe lamp. E plafònt ta kita kai. Ni sèn pa lampi no tin, paso apenas tin sèn pa koriente.
Esaki ta parti patras di un kas. Ku par di tabla a sera un muraya i a improvisá un porta.
