Kada bia ku Wensley Francisco ekperensiá algu masha bon, esaki ta trese un bòlòbònchi den su kabes.
E trahadó di dokumental, direktor kreativo di Huis van Asporaat i awor tambe outor, tabata den e posishon privilegiá ku tres editor ker a saka su promé novela ‘Rust’(‘Sosiegu’). I nan mester a kont’é kiko nan tabatin pa ofres’é.
Despues a invit’é na e programa di buki Brommer op Zee na televishon, algu ku kasi nunka no ta sosodé ku un debutante. Anto até atrobe, e bòlòbònchi den su kabes, Francisco ta konta. “Ta kon por ta? Ta privilegiá mi ta awó? Òf ta bon mes mi ta?”
Novela ku toke outobiográfiko
‘Rust’ ta trata di Lucci, ku ta lanta sin tata. Su mama ta bai Tilburg kuné ora e ta mucha chikí i ei finalmente e mama ta bira un reina di droga bon organisá. Lucci ta lanta ku hopi tenshon i káos i finalmente ta drenta ehérsito. Meskos ku Francisco a hasi un dia.
Su buki ta parsialmente outobiográfiko.
‘E bunita di mi buki ta ku pa un parti e ta tuma lugá na e islanan i pa un parti na Tilburg, den e provinsia i tur kaminda na Hulanda. Mi no ta purba kategorisá mi mes komo un hende di desendensia migrante. Mi ta bisa: m’a muda, mi no a emigrá. Nò paso mi tin un koló mi ta migrante. Nos ta hulandes.”
Francisco ta sigui: “Pa bringa asuntu manera rasismo, bo mester kleim kompletamente ku bo ta siudadano hulandes. Polítika konstantemente ta pone nos un banda komo siudadano di segunda kategoria loke ta pone ku bo no por pone e mésun eksigensianan ku e hulandes blanku.”
Skibi pa keda skibi
Francisco a skibi e buki pasobra el a mira e lista di eskritor karibense. “E tabata masha impreshonante, pero masha kòrtiku. I hopi di nan a fayesé kaba, Diana Lebacs poko tempu ei mes. Nos mester sigui yena e lista ku eskritor, pasobra si tur hende riba e lista ei muri, nos no tei mas. E ora ei a kaba.”
“Mas parti nos ta konta otro historia, nos no ta kue un pèn pa skibi nan. No mester laga skibimentu bira ‘cool’. Mi ta skibi pa pone plafòn rementá habri pa asina e generashon despues di mi tambe skibi. Nos relatonan ta konta!
‘Mi ta skibi pa pone plafòn rementá habri’
Den su buki bo ta sinti su rèspèt i atmirashon grandi pa hende muhé i asta tin bia asko pa hende hòmber. “Fin di añanan 80, kuminsamentu di añanan 90 tabatin e kumbre di machismo. E hòmbernan tabatin hopi afan pa prueba nan mes, tabatin preshon di grupo pa traha hopi yu. E muhénan tabata haña e kuido, e hòmbernan tabata rolling stone, Bo no por ta egoista si bo mester kuida. Si bo no tin ku kuida, bo ta djis sòru pa bo propio kuminda.”
Francisco ta bisa ku e tin e machismo den dje tambe. “Mi ta kontentu ku esaki. E ta pone ku bo ta mas sosial, mas kariñoso, bo ta kuida bo mes mihó i nan ta mira bo. Hende muhé no ta wak un hòmber ku ta sinta ketu ketu den banda sin hasi nada. I naturalmente hende muhé tambe por ta machista i resaltá. Ta trata di balansa. E no mester bira narsismo.”
Kòrsou ta kana dilanti den feminismo
Francisco i su amigunan tabata ker a tei pa nan yunan, tambe si e relashon ku nan yunan su mama a kaba.
“Den famia blanku esaki tambe ta hunga i e hòmbernan ta bisa: sí, pero hende muhé a bira asina independiente. E ora ei mi ta pensa: bai Kòrsou pa bo mira kon Hulanda ta bai bira. E muhénan di mi isla semper kaba tabata masha feminista.”
“Nos tabatin Maria Liberia Peters komo promé minister presidente di Reino hulandes. Esei Hulanda mester alkansá ainda. Serka nos ta eduká tur dos sekso pa independensia. Mucha hòmber mester por kushiná, laba paña, strika i kuida nan mes i mucha muhé mester por gana nan mes pan”, e ta splika.
“Pasobra pa motibu di sklabitut nunka bo no tabata sa ki dia ta bende bo kasa i bai kuné. Awor nos mester krese bai un mindset nobo. No mas: Kon mi ta sobreviví? Sino: Kon nos ta sobreviví huntu!”
Despensa pa e pasado di sklabitut
Papiando mas aleu di sklabitut, Francisco ta masha kontentu ku Hulanda ta bai pidi despensa. “Manisé di e despensa, nos mester hinka sèn den investigashon di pasado, òf fókùs riba awe? Pasobra pa motibu di kambio di klima e islanan lo bai haña un sla duru. Wak Boneiru aworakí kaba.”
“Si nos hinka e sèn di e fondo di konsientisashon ei den enseñansa i pèrkurá pa nos eduká e generashonnan binidero den téknika manera panel solar i mulina di bientu, nos ta kla pa e transishon di energia. Si nos kuminsá ku esei otro aña, na 2035 nos tin un generashon ku por akapará.”
Stòp ku blackwashing
Francisco ta haña ku e sèn berdaderamente mester bai pa e hendenan aya. “Puntra un habitante di e islanan òf un surinameño: Kon bo ta haña un fondo? Nos no sa. Metikulosamente ta keda sin siña nos. E hulandes blanku sa e kaminda i e sa kon papia i skibi pa su organisashon haña sèn.”
“E ta sòru pa un tiki blackwashing, e ora ei ta atraé un persona koló skur i ta show kuné, i entretantu nan ta usa e sèn manera nan ke. Mi ta bisa: hinka e sèn den edukashon di e islanan. Kuminsá serka hubentut. Si bo no eduká un pueblo bo no ta logra nada!”