“Hulanda ta para habrí pa papia tokante e pago pa daño kousá pa sklabitut, pero i islanan karibense mester hasi lihé sí.” Esei ta e konvikshon ku Gilbert Bacilio tin despues di un kombersashon ku e minister hulandes Robbert Dijkgraaf (OCW).
Segun Bacilio awor mester duna atenshon na e ‘kòma’ ku promé minister Mark Rutte a pone tras di e despensanan pa e papel ku Hulanda tabatin durante di e temporada di sklabitut. Rutte a hasi esei riba 19 di desèmber aña pasá durante un spich ku a transmití na tur isla karibense.
“E kòma ei ta nifiká masha hopi, pero nos mes mester trese loke nos ke mira tras di e kòma.”
‘Hulanda ke tende nos opinion’
Esei ta e mensahe ku Bacilio a keda kuné despues di e kombersashon ku Dijkgraaf. E minister hulandes a papia ku tres miembro di Plataforma Sklabitut i Herensha di Sklabitut, entre na Gibi Bacilio. Tambe el a papia ku un delegashon di National Archaelogical Anthropological Memory Management (NAAM).
Segun Dimitri Cloose, direktor di NAAM, Dijkgraaf tabata masha habri den e kombersashon ei. “E ke sa kon nos ta mira e herensia di sklabitut i e konmemorashon di e abolishon di esei.”
“Den pasado e mandatarionan hulandes hopi bia tabata bini aki pa konta kon nan ta mira e kosnan”, Basilio ta bisa. “Dijkgraaf i tambe sekretario di estado Van Huffelen ke tende nos opinion.”
Pago pa daño ku a kousa pa alkansá atraso
Minister Dijkgraaf ta e mandatario kordinadó di e aña konmemorativo di pasado di sklabitut. El a pidi entre otro Bacilio i Cloose kon Kòrsou ta mira e pago pa daño ku a kousa, unda e atrasonan den komunidat ta, kon por sufri e atrasonan aki i kiko Hulanda por hasi na esaki.
Anteriormente e plataforma kurasoleño a indiká ku mester bini pago di daño kousá pa alkansá e atrasonan na e islanan karibense den e último siglonan komo konsekuensha di sklabitut. Mester di invershon pa esaki, manera den enseñansa i ekonomia.
“Loke nos ta komprondé awor ta ku Hulanda ta kla pa papia tokante e pagonan pa daño kousá. Pero ta mi konvikshon ku si nos no bini ku un plan na tempu, si nos no reakshoná sufisiente rápido, Hulanda ta tuma e direkshon i ta bisa kiko mester sosodé. Nos mester pèrkurá pa esaki no sosodé”, Basilio ta bisa.
‘Awor nos mester dal bai’
Promé ku fin di luna e ke bini ku un promé enfoke pa sigui papia.
“Ademas ta importante ku nos ta haña sosten di komunidat i otro organisashonnan envolví. Den henter Reino nos tin kontakto ku diferente organisashon, tambe na Hulanda, na e otro islanan karibense i ku Sürnam.” ‘Kordinashon i sinkronisashon’ segun e ta importante awor.
“Tin trabou di hasi. Awor nos mester tuma e asuntu serio i no pèrdè nos mes den diskushon òf otro asuntu. Ban p’e!”
Pago pa daño kousá?Minister Dijkgraaf lo a tene ‘kombersashon bon i balioso’ tokante e pasado di sklabitut na Kòrsou, entre otro ku Plataforma Sklabitut i Herensia di Sklabitut. Un bosero di e ministerio hulandes di OCW ta enfatisá ku e pagonan pa daño kousa pa sklabitut no ta na órden aktualmente. Aworakí gabinete hulandes ta pensa na e kitamentu di ‘desigualdat i atraso na Kòrsou’. “E kombersashon ei no a trata di pago pa daño kousá. Mas tokante kon e pasado di sklabitut ta aktual te awe, manera den desigualdat i atraso den enseñansa i konosementu”, segun e bosero. |
