Rei literalmente ta haña señal di huma for di Aruba

3 February 2023 | Melissa Stamper en Sharina Henriquez

Famia real djaluna a haña un bonbiní kaluroso di e habitantenan di Aruba. Esaki no a sosodé sin mancha: e grupo real ora nan a yega Aruba entre otro a haña un sorpresa di nubia grandi di huma di e kaminda di kima sushi Parkietenbos.

Riba medionan sosial ta kompartí e mensahe ku ‘e promé kos ku rei lo puntra ora e baha for di avion ta: ta esei ta Parkietenbos?’ Minister di naturalesa Ursell Arends (Raiz) ta bisa Ret Karibense ku ta kla ku esaki ta un mensahe pa e famia real. “Lo straña mi si rei no a mira esaki for di e avion.”

Yegada di e avion na Aruba ku e grupo real na bordo (potrèt: Parkietenbos Stories)

Ta bini un investigashon interno di e kandela i posiblemente tambe un denunsia, e minister ta bisa.

Segun Arends mésora su ministerio a tuma akshon tambe. “Kompania di shushi Serlimar tin e imágennan di vidio i ku esakinan lo tuma e pasonan ku ta sigui pa hasi denunsia, segun e mandatario djis promé ku e famia real a yega Wilhelminaplein.

Atenshon pa hubentut
E komienso yen di huma no por daña e ambiente. Sigur mil mucha di skol arubano ta para zuai banderita hulandes i arubano pa duna Rei Willem-Alexander, Reina Máxima i prinsesa Amalia bonbiní. Den e programa arubano tin hopi atenshon tambe pa hubentut.

Sigur mil mucha di skol tabata esnan di promé ku por a kuminda e grupo real na e kapital arubano (potrèt Melissa Stamper)

Skolnan a reakshoná masalmente riba e yamada pa partisipá na e seremonia di bon biní. Un 7 mil registrashon a drenta mésora. E organisashon a dirigí un parti di e muchanan di skol pa e sentro deportivo Centro Deportivo Figaroa na Noord, pa asina tòg nan por a sigui e seremonia.

Na skol mes e siman aki a adaptá e programa di lès, pa asina hubentut haña mas atenshon pa e historia di Reino, Nicole Hoevertsz ta konta. E ta presidente di e organisashon responsabel pa e bishita real na Aruba.

Banda di e muchanan di skol tambe e Leerorkest Aruba a duna e grupo real bon biní ku e kantika ‘Bon Bini’. Esaki ta kousa un reakshon entusiasmá visibel serka reina Máxima huntu ku prinsesa Amalia. Máxima tambe ta empeñá pa edukashon musikal.

Watch on YouTube (opens in a new tab)

Ambiente durante bishita real na San Nicolas (Video: Sharina Henriquez)

Mas demonstrashon
Den atardi tambe tin dos demonstrashon chikí. Habitante Anouk Balentina ku añanan largu ta lucha kontra e tiramentu di shushi na Parkietenbos, durante e bishita real na San Nicolas ta protestá ku un spanduk grandi. Tambe el a manda un karta habri pa media dirigí na rei.

Habitante Anouk balentina ta demonstrá pa derecho igual (potrèt: Melissa Stamper)

“Fèrfelu ku e lugá di tira sushi ta na kandela atrobe. Di otro banda ta un bon bista rei ta haña di e situashon. No por skond’é mas.”

E ta bisa ku e sa ku rei no ta polítikamente responsabel, pero tambe e ta bisa ku e tin e responsabilidat pa tur siudadano den reino tin e mésun derechinan: “Mi tambe ke tin esei, meskos ku e hulandesnan oropeo.”

‘Kas real mester paga’
Band’e dje ta para Helena Croes ku dos otro miembro di Aruban Warriors pa e derechonan di habitante indígeno di Aruba. E tin e deklarashon serka dje ku anteriormente kaba el a entregá na e Representashon hulandes (VNO) na Aruba na desèmber di aña pasá. Awor e ta spera di entregá esaki na rei. Esei no ta logra pero sekretario di estado Van Huffelen si ta tum’é.

Sekretario di estado Van Huffelen ta tuma e deklarashon di Aruban Warriors

“El a bisa ku e lo duna rei. Mi a puntr’é si el a haña e deklarashon di VNO kaba i el a bisa: nò. Rei tambe mester paga pasobra ta kas real tambe a haña e oro hòrtá. Mi no ke pa e pagadó di impuesto na Hulanda mester pag‘é, kos ta pisá pa nan kaba”, segun Croes ku entre otro ke 66 bion florin di kompensashon.

Pasa e kaminda di tira sushi ku barku
Despues di e bishita na San Nicolas, rei Willem-Alexander, reina Maxima i prinsesa heredero Amalia ta barka i tambe ta nabegá pasa e lugá di tira sushi Parkietenbos. Riba promé di yanüari ofisialmente a sera esaki, pero ainda tin kandela i otro molèster. E problemanan pa e barionan ku ta rondon’é tampoko no a solushoná pasobra tin un kaminda di kima sushi ei ku ta violá e reglanan di airu limpi.

Segun minister Arends gobièrnu ta hibando kombersashon ku dos instituto hulandes pa bini ku un petishon di informashon (RFI) pa un solushon duradero. E intenshon ta pa tapa e sitio di tita sushi, pa por transform’é den un parke solar.