Portrèt: Sharina Henriquez

E polítiko arubano Alan Howell ta keda para ariba ku e 11 mil florin ku el a saka for di e kaha di frakshon pa un bónùs di San Nicolas, tabata un ‘chansa’. Pero esaki no por a pone wes hari, i el a dun’é dos aña de sèl pa malversashon di un total di kasi 200 mil florin.

E sèn aki tabata bini di e frakshon di POR ku Howell tabata miembro di dje. Asina ta ku ta sèn di e pagadó di impuesto. Howell a hòrta e sèn di e frakshon miéntras ku e tabata visepresidente tambe di parlamento arubano durante e gabinete Wever-Croes I.

Kousa di kaida di gabinete na 2021
E promé minister aktual, lider di MEP Evelyn Wever-Croes, a laga su promé gabinete kai na 2021 ora el a tende di e investigashon penal di Howell, ku a kaba di bira lider di partido di POR. E no tabatin konfiansa mas den su partner di koalishon POR.

Te ainda Howell ta pretendé ku ta e promé minister huntu ku su partidario e tempu ei, Andin Bikker ku tabata minister di hustisia, ‘a freim’ e. Bikker a tuma distansha di POR despues di e di tantu skandal den e partido. Howell ta pensa ku POR komo partido nobo a bira muchu poderoso i ta p’esei nan a lag’é kai.

Kastigu pisá pasobra Howell ta agente di polis tambe
Wes ta mira esaki diferente, asina a sali durante di e sentensia: ‘un polítiko ku ta abuzá di su posishon komo representante di pueblo i ta pone su interes personal riba e interes di e siudadano’. Esaki ta daña e konfiansa tambe, e ta bisa, ku hende mester tin den persona den posishon importante.

Pasobra banda di polítiko, Howell ta un funshonario haltu di polis, loke wes ta tum’é hopi na malu. Banda di esei e no a mustra di ta konsiente di su kulpa. Anteriormente e polítiko arubano den media a bisa ku e ta ‘desapuntá’ den e trabou di investigashon di su koleganan di polis.

Bónùs di San Nicolas i konseho pagá di su tata
“No ta un chiste, sino un partimentu serio di sèn di e fundashon di e partido.” Esei wes ta husga tokante e bónùs di San Nicolas di 11 mil florin di kua Howell a laga paga dies mil na su mes i e sobrá na su tesorero fiel.

A sentensié tambe pero wes ta haña ku – lòs di e bónùs – tin insufisiente prueba di intenshon malu. Howell espesialmente a hasi mal uso di su kredulidat, nan tabatin amistat pa basta aña. Asina ta ku riba e mayoria di puntonan a apsolb’é.

Un 65 mil florin di e kaha di frakshon lo a bai pa e tata – entretantu defuntu – di Howell, pa konseho hurídiko. Pero Howell senior henter su bida a traha komo maestro di skol i no tabata ni hurista ni abogado, wes ta bisa.

Tampoko niun kaminda no tabatin registrashon di e negoshi di un persona di e tata. Mensualmente Howell lo a paga su tata 3000 florin kèsh. Pero den korte e no por a produsí e konsehonan di su tata. Sen di frakshon a bai tambe pa e skol di siña stür di su kasá.

Fiansa kèsh, den apelashon

Alan Howell (rechts) verlaat de rechtbank met zijn advocaat na het horen van zijn vonnis (foto: Sharina Henriquez)

Alan Howell (man drechi) ta sali korte ku su abogado despues di tende e sentensia (potrèt: Sharina Henriquez)

Howell komo defensa ta bisa ku el a adelantá hopi sèn kèsh i despues a buska e sèn bèk serka e fundashon di e partido. Un deklarashon positivo di dos accountant tokante e kuentanan anual di e fundashon ta mustra ku e no a hòrta nada, e ta bisa.

Wes ta haña ku tin insufisiente prueba: pasobra e accountantnan no a kontrolá si e fakturanan i resibunan tabata korekto. Basta faktura i resibu a surgi di repente ora ku e kaso penal tabata kore kaba.

E abogado di Howell tambe ora kaba ta reakshoná ku e atministrashon di e fundashon di e partido por tabata mihó. Pero esei no ta nifiká ku su kliente ta kulpabel. Nan lo apelá e kaso.

Howell apénas ke reakshoná riba e sentensia. Si e ta sigui ku su karera polítiko, ku el a kuminsá kuné dies aña pasá? “Mi no por bisa nada di esaki. Mi mester papia ku mi famia promé.”