Na Boneiru, Mental Health Caribbean a saka e buki ‘Un kashi yen’. E buki mester fasilitá pa mayor i yu papia di nan emoshonnan i ekperensia fèrfelu.
“Mi a siña ku hende mester keda papia ku otro”, un mucha hòmber chikí boneriano ta konta durane e presentashon di e buki. “Sino bo kashi ta yena, bo kabes ta yena i esei por ta dañino.”
‘Mayor na Boneiru hopi bia ta sobreviví nan mester sobreviví’
Mucha ta sinti i mira si nan mayornan falta algu, pero tòg kasi nunka no ta papia di sintimentu fèrfelu, e sikólogo di salubridat Mariëlle Hoekstra ta mira.
“Mayornan na Boneiru hopi bia mester sobreviví. Nan tin diferente trabou i tin bia ta keda kana hopi tempu ku problema, pasobra nan no sa tur ora unda nan por akudí, òf nan tin bèrgwensa.”
Hoekstra ta mira ku mucha tambe ta víktima di esaki. “Nan por haña e idea ku ta nan falta ku nan tata i mama ta reakshoná diferente. Ku kisas ta nan no ta bon”, Hoekstra ta bisa.
‘Na idioma materno e impakto ta mas grandi’
Na Hulanda e buki tabata eksistí kaba, pero Un kashi yen ta tradusí na papiamentu i a pon’é den un konteksto karibense. “E plachinan i e nòmbernan naturalmente a kambia”, e lider di e proyekto Krista Oplaat ta konta.
“Pero tambe tin partinan di e relato ku ta diferente. Nos a agregá un emoshon konosí, esta e chiu.Un zonido ku ta usa pa laga sa ku bo no ta aprobá algu òf ku algu ta indigná bo.
“I komo e ta skibí den e idioma materno, e efekto ta mas grandi”, traduktor Sharine Severina ta bisa.
‘Dùrf di papia di problema na kas’
Na diferente skol ya kaba a papia tokante di e buki den klas. Oplaat a ripará ku den klas e relato ta lòs hopi emoshon serka e muchanan. “Nan por a konta masha abierto tokante loke nan mes a pasa aden òf a rekonosé den e relato. Tin di nan a bisa ku nan mes tambe tin un kashi asina.”
Oplaat: “Tin karchi tambe aserka ku diferente emoshon pa asina bo por papia di nan na un manera sin opstákulo. Mayornan lo mi konsehá pa nan mes repasá e buki i wak kiko nan ta rekonosé. Despues bo por drenta un kombersashon i komprondé otro mihó.”
“Nos tur sa pasa den kos ku por molestiá nos”, Hoekstra ta bisa. “Pues tin e kurashi di wak den bo kashi i papia di dje na kas. Kibra e tabú ku emoshon ta straño.”