Pintura, pintura mural, eskultura, instalashon. E bario Otrobanda na Kòrsou e siman aki ta masha animá ku arte. Hende hóben i bieu, nòmber konosí i talento nobo. Tur hende ta haña un chèns di mustra nan obranan durante e promé Kaya Kaya Art Week.
“Nos a traha masha duru tres dia”, Hilma Koelman ta bisa. Su pinturanan ta kologá den un di e kuartonan di e impreshonante Keizershof. “Tabatin tera aki den te kasi un meter di haltura.”
FOTO Artista di diferente disiplina ta kompartí un espasio durante Art Week. E obranan di arte ta mustra èkstra bon den e edifisionan bieu, poko dekaí, i ku hopi ambiente. Potrèt: Eva Breukink
E artistanan ta ekshibí den edifisio ku hopi bia a para bashí hopi tempu. E organisashon di e festival di kaya Kaya Kaya ta pèrkurá pa tin koriente. Pero pa sobrá ta na e partisipantenan pa nan mes krea algu ku e espasio.
Chiel van Zeist gusta e manera dekaí di e edifisionan ku no ta usa. E fèrf ku ta kaska bini abou di e murayanan, e plafònnan haltu, habrí i e mosaikonan bieu di e flurnan. Ta manera e kolonan bibu di su pinturanan ta spat ku mas forsa for di e kuadronan.
Organisadó Kurt Schoop ta ‘orguyoso’ ku pa promé bia Art Week ta tuma lugá promé ku e festival, e ta skibi riba Facebook. “Djis numa, pa selebrá nos artistanan, nos kultura, nos siudat, nos monumentonan i nos bario Ser’i Otrobanda.”
Es ku kana e ruta, mesora ta sinti algu di e bida aki den e hanchinan smal di e siudat. Aki músiko grandi kurasoleño a lanta. Aki tin hende ta biba.
FOTO Maghalie van der Bunt-George a pinta e parti pafó di su edifisio komo un homenahe na su desendensia. Den e bario aki su tata a lanta. Potrèt: Eva Breukink
Maghalie van der Bunt-George a ekshibí su eskulturanan den un propio edifisio chikí. A kambia e kuarto bashí ku kashi i ‘potoshi’ den un tipo di sala i na e muraya tin pintura di un kolega ta kologá. “Mi gusta ku awor hende ta haña un chèns di mustra kiko nan a traha. Algu ku nan a traha di kurason i alma. Asina nos ta inspirá otro. E ta trese un ‘vibe’ positivo.”
Kada “Art House’ riba e ruta ta un fuente di kreatividat. Hopi bia artista ta kompartí un espasio. Huntu nan a kologá i pone nan obranan i ta anda ku otro kaba pa dianan. E bishita na Art Week no ta solamente un enkuentro ku obra di arte sorprendente sino tambe ku esnan ku a traha esakinan.
FOTO Trevor Terzol ta traha na un eksposishon slo. Potrèt: Eva Breukink
Un amigu a konvensé Trevor Terzol (25) pa partisipá. Trevor tabata un di e talentonan hóben di Instituto Buena Bista. “Mi ta pinta loke mi ta pasa den, den mi bida. Esei ta un komienso pa un kombersashon.” E ta duna workshop durante e Siman di Arte. Partisipante ta siña téknikanan básiko di pintamentu. “Asina mi ta duna hende un empuhe. Nan ta deskubrí loke nan por.”
Promé lustro di Kaya Kaya
E festival di kaya Kaya Kaya na Otrobanda ta djasabra 2 di sèptèmber. E organisashon ta ferwagt ku e aña aki e evento lo atraé 20 mil bishitante. E di sinku edishon ta sinku bia mas grandi ku ‘mas muzik, mas arte, mas kuminda den un área mas amplio’. E Art Week ta te djadumingu 3 di sèptèmber.