Habitante di Boneiru i Greenpeace na yanüari a bai wes pa keha estado hulandes. Nan ta haña ku Hulanda mester bini ku medida mas lihé posibel pa kombatí e konsekuensianan di kambio di klima na Boneiru, Saba i Sint Eustatius.
Ret Karibense a sera konosí ku e diferente abitantenan ku komo ‘demandante’ ta empeñá pa e kaso den korte. E bia aki ta Judmar Emerenciana i Jackie Bernabela.
Judmar Emerenciana ta artista, diseñadó gráfiko i shafer di taksi. Ounke ku komo demandante e ta empeñá pa e kaso den korte, e no ta konsiderá su mes komo aktivista di klima. “No nesesariamente. Sí mi ta haña ku ta importante pa usa mi bos komo boneriano pa konta tokante e situashon.”
Pa lucha pa e mesun meta huntu un grupo di habitante, ta sinti bon segun Emerenciana. “Asina bo ta haña sa hopi tambe tokante e manera ku kambio di klima ta toka otro hende den nan bida diario. Mi ta un di esnan mas hóben, pues di tur manera mi ta siña hopi di e otronan.”
Demandante Jackie Bernabela sí ta yama su mes un aktivista di klima. “Mi ta un di e yunan di tera ku ta lucha pa e kaso aki. Hopi bia ta yama hende ku ta protestá histériko. Pero ta e echonan ta berdaderamente histériko.”
Kalor i e nivel di laman ku ta subi
“Tur kaminda na mundu tin orkan i tin mondi na kandela”, Bernabela ta bisa. “Pero aki tambe nos ta ripará e konsekuensianan di e emishon di CO2. Si por ehèmpel bo wak e kasitanan di esklabo bon, bo por mira ku e awa di laman a yega tera basta leu kaba. El a afektá e parti abou di e kasitanan kaba.”
Emerenciana tambe a ripará e subida di e nivel di laman. “Bo ta mira esaki serka e kasitanan di esklabo, pero tambe na Sorobon. Promé ku e rapòrt di Greenpeace, mi no tabata sa kon malu e situashon tabata berdaderamente.
Ounke naturalmente mi tabata sinti sí ku e klima tabata kambiando.” Por ehèmpel, e temperatura no ta meskos ku ántes. “Tempu ku mi tabata chikí semper nos tabata hunga futbòl pafó i hopi bia mi tabata bai skol na pia.
Aktualmente ta hasi muchu kalor pa esaki. Pa hopi hende grandi di edat tampoko no ta fásil pa djis sali bai pafó, nan ta preferá keda sinta paden den èrko.”
Prekupashon
Bernabela i Emerensiana ta masha preokupá pa e echo ku no tin un plan pa protehá habitante. “Nos mester adaptá mas lihé posibel na e kambio di klima”, Bernabela ta bisa. “Por ehèmpel den e área di seguridat, riol, servisio di emergensia, ets. Nos kayanan aworakí kaba apénas por prosesá e awa di yobe.”
“Si nos no haña yudansa, e hendenan den e parti Sùit ta pèrdè nan kasnan”, Emerenciana ta bisa. Nos ta pèrdè Sorobon tambe, kaminda ta nos ta windsurf, Lac Baai kaminda un gran parti ta bou di awa kaba i e kasitanan di esklabo. Un parti di nos historia.
Inisiativa na Boneiru mes
Segun esnan ku a keha estado hulandes tin bon inisiativa na Boneiru, pero esei no ta sufisiente. “Manera e plantamentu di palu di mangel. Algu ku tambe por wanta e awa”, Emerenciana ta konta. “Pero esakinan ta kos chikitu. Nos ta spera ku Hulanda por yuda nos mas aleu.”
“Na Klein Bonaire i den e Parke Washington por ehèmpel tambe ta planta palu, pero ta dura basta largu pa un palu asina bira basta grandi pa por apsorbé CO2”, Bernabela ta bisa. “Tin bia nos ta desesperá un tiki, pasobra kontrali na e paisnan grandi, nos no por hasi masha.”
Espektativa
Emerenciana i Bernabela ta spera ku e situashon lo bira konosí serka mas hende. “Asina nos por kolaborá mihó i yega na solushon”, Emerenciana ta bisa. “Pa asina nos yunan i ñetunan tambe tin un futuro aki.”
“No ta trata solamente di traha dèik, sino tambe di konsientisashon”, Bernabela ta bisa. “Ta e muchanan di futuro lo haña e konfrontashon berdadero i mi ta haña esaki masha grave. Mi ta spera ku Hulanda lo no laga nos pa nos kuenta.
For di investigashon di Vrije Universiteit Amsterdam, bou di enkargo di Green Peace, a sali ku e kantidat di hende malu i morto pa motibu di tempu ekstremo i ola di kalor lo krese. Na fin di e siglo aki ta ferwagt ku u di sinku parti di Boneiru lo resultá bou di awa si no tuma akshon. Tòg pa e munisipionan ekstraordinario apénas tin plan pa protehá habitante, kontrali na Hulanda oropeo.
