Na Boneiru a sali un buki ekstraordinario tokante yerba i mata krioyo i e efekto kurativo ku nan tin pa nos kurpa. “Ku ‘Mata i yerba di mama tera’ nos ke komuniká kon importante yerba i mata ta, kon nos por konservá e kultura rònt di nan i protehá nan”, e eskritora Denise De Jongh-Rekwest ta konta.
Ounke e uso di yerba i mata pa nan funshon kurativo un temporada tabata ménos, ta manera e último añanan e kustumber ta bini bèk. “Ántes no tabatin dòkter. E tempu ei nos tabata usa mata i yerba pa kura hende”, De Jongh-Rekwest ta bisa.
“Awendia hopi hende na Boneiru ta bai kuradó i dòkter di yerba si nan tin keho di algu. Esakinan ta konta nan kua yerba òf mata nan mester usa a base di nan síntomanan.”
De Jongh-Rekwest bou di enkargo di e organisashon di naturalesa Stinapa dos aña tabata traha ku diferente dòkter di yerba i kuradó di Boneiru. Nos a hasi komprensibel pa hende pa kiko asina por yerba i mata, kiko ta e mihó tempu pa piki esakinan, kuantu blachi bo tin mester i kon largu mester laga nan trèk pa por ehèmpel te.
Hopi bia esakinan ta yerba ku hende mes tin den nan kurá. “Hopi hende ku ta kuida nan salú ke hasi esaki na un manera mas natural posibel i mi ta pensa ku e buki tambe por yuda nan ku esaki.
Lanta ku yerba i mata
De Jongh-Rekwest mes tambe tin hopi afinidat ku mata i yerba. “Tempu ku mi tabata chikí, mi madrina i mi tata tabata bebe te di yerba kaba. Mi tabata wak ora nan bai den kushina bai trah’é, pues mi a lanta kuné.”
“Mi yerbanan preferí ta lamungras i oregano” De Jongh-Rekwest ta konta. “Di den e buki mi ta haña Klasmulato esun di mas interesante. Esei por ehèmpel ta bon kontra preshon haltu.”
Tòg De Jongh-Rekwest mes tambe a siña hopi kos nobo durante e skibimentu di e buki. “Espesialmente di otro dòkter di yerba i kurandero. Tokante e preparashon, kon e ta traha, pero tambe kon mi mes por rekonosé e diferente matanan i yerbanan
Tempu ta bira difísil pa mata i yerba
E yerba di e buki ku pueblo di Boneiru ta usa mas tantu segun De Jongh-Rekwest ta Flaira. “Tin Flaira kòrá i Flaira blanku. E ta traha masha bon si por ehèmpel bo tin doló di garganta, òf un herida, pero tambe pa diabétis.”
Ounke hopi hende tin mata i yerba den na mes kurá, tin sierto tipo ku pa motibu di kambio di klima tin e riesgo ku nan lo disparsé. “Tin mata i yerba ku dia pa dia ta bira mas difísil pa haña nan”, De Jongh-Rekwest ta bisa.
Por ehèmpel e Yerba di Seru (un mata ku un flor blanku chikí), pero tambe otro mata ku berdaderamente mester di áwaseru. Último añanan nos a haña mas sekura i esei ta un peliger grandi pa nos matanan i yerbanan.”
Pesei De Jongh-Rekwest ta kontentu ku mas i mas hende ta trata ku mata konsientemente. “Por ehèmpel pa medio di stèk. Mi ta spera tambe ku e buki lo lanta e interes di hóbennan, pa kisas finalmente nos por haña mas dòkter di yerba na Boneiru i e otro islanan.