Riba 17 di mei mundialmente ta selebrá Dia Internashonal kontra Homofobia i Transfobia (IDAHOT). E dia aki ta marka un momentu pa konmemorá e adelanto i e retonan den e lucha pa derecho igual di komunidat LGBTIQ+. Segun Human Rights Caribbean (HRC) na Kòrsou bon mirá a pone paso dilanti, pero e kaminda ta largu ainda.
For di 2019 diesun pais a legalisá e igualdat di matrimonio i for di 2017 diestres pais a abolí lei ku ta bisa ku seksualidat LBGTIQ+ ta kastigabel. Tòg tin desena di pais ku ainda ta kriminalisá relashon konsensual entre hende di sekso igual. Tin pais kaminda persona seksualmente diverso ta riska kastigu di morto pa motibu di nan identidat i seksualidat.
Área Karibense
Den Área Karibense, no leu di Kòrsou, hende di e komunidat LGBTIQ+ na Grenada, Guyana, Jamaica, Saint Lucia, Saint Vincent i Grenadines ainda ta riska kastigu di prizòn di 10 aña.
“E kriminalisashon di komportashon entre hende di sekso igual ta kontra norma internashonal”, Janice Tjon Sin Kie, presidente di HRC, ta enfatisá.
E lucha na Kòrsou
Na Kòrsou na aña 2024 ainda tur hende no tin e mésun derechonan humano. E lucha pa igualdat ta un lucha ku mas ku 50 aña kaba diferente agrupashon i organisashon ta hiba.
“Kòrsou tin un historia riku di desigualdat. Djis pensa riba sklabitut, desigualdat rasial i hende muhé ku no tabatin derecho di vota 76 aña pasá”, Tjon Sien Kie ta bisa.
E klima polítiko di awendia no ta fasilitá e situashon. Tin bos ku ta boga pa ankra e matrimonio entre hende hòmber i hende muhé den e areglo di estado. E proposishon aki ta ekskluí un parti di e komunidat i ta bai kontra e lucha pa derecho igual.
Lucha hurídiko
HRC huntu ku un pareha lesbiano a entamá un kaso den korte kontra gobièrnu di Kòrsou pa motibu di diskriminashon a base di orientashon seksual. “Korte a disidí ku ta trata di diskriminashon i ku no tin hustifikashon pa no introdusí e matrimonio homoseksual”, Tjon Sien Ki ta splika.
“Kòrsou pa basta tempu kaba ta laga di adaptá su legislashon, loke ta kontra e prohibishon di diskriminashon di e Staatsregeling (Areglo di Estado). Mucha LGBTIQ+ ta masha vulnerabel.
Tantu na kas komo pafó di kas hopi bia nan ta eksperensiá problema pa motibu di nan gender i orientashon seksual. Instanshanan lokal regularmente ta mira hóben ku tin problema na kas i ku hopi bia ta víktima di tèr na skol, loke ta forma un faktor di riesgo pa suisidio.
Bista den futuro pronunsiashon kasashon
Gobièrnu di Kòrsou a bai den kasashon kontra e pronunsiashon di e wesnan lokal serka Korte Supremo na Den Haag. E veredikto di e kaso aki ta tuma lugá tentativamente riba 12 di yüli binidero. “Nos ta spera ku Korte Supremo lo konfirmá e sentensia di e kortenan menor i ku esaki ta pone un paso importante den direkshon di derecho igual pa tur hende na Kòrsou”, segun Tjon Sin Kie.
Statement di Corendon
E kompania Corendon riba 17 di mei a manda u mensahe di prensa, den kua e ta pronunsiá ku e ta pro derecho igual na Kòrsou. E kompania, ku ta bisa ku e ta hopi envolví den e ekonomia lokal i e komunidat lokal, ta enfatisá ku tur empleado i tur huéspet di hotèl mester risibí trato igual, a pesar di nan disposishon seksual òf nan identidat di gender.
CEO Atilay Uslu ta bisa ku no tin lugá pa diskriminashon den Corendon i ta boga pa legislashon ku ta sostené igualdat i no diskriminashon. Ku nan deklarashon riba e Dia Internashonal kontra Homofobia i Transfobia nan ta enfatisá e importansia di e derechonan aki pa Kòrsou.