Ketu bai no ta atraktivo pa bai Kòrsou bèk ora bo kaba di studia

23 July 2019 | Kim Hendriksen

WILLEMSTAD – Pa bai bo isla bèk despues di bo estudio na Hulanda ta keda inatraktivo pa mayoria di hóben di Kòrsou, asina a sali for di kombersashon ku nan.

Geert Huisman despues di su estudio a regresá na aña 1999. E ta rekonosé e problemanan ku hopi studiante ta topa kuné ora nan bini bèk. “Un di e motibunan mas importante pa no bini bèk tòg ta sèn. E salarionan na e isla ta hopi mas abou ku por ehèmpel na Hulanda.”

E kondishonnan di labor tambe ta ménos bon reglá, e ta bisa. Manera penshun. “Bon mirá t’asina ku bo no ta spar nada, i esaki ta stroba hopi hóben kurasoleño di bini bèk i keda.”

‘Hendenan lokal no ta aseptá ku e hóbennan a bira mòndu’- Geert Huisman

Pero e aseptashon remarkablemente ta un problema, Huisman ta bisa. “Ta paga nan ménos ku e hulandes blanku na e isla i no ta aseptá nan. E hendenan lokal ku no a bai studia no ta aseptá ku e hóbennan durante nan estudio a bira mas mòndu. Aki ta reina un kultura di ‘ken konosé ken’ i di patronahe. Bo ta haña trabou mas lihé si bo konosé e hendenan nesesario i no pa motibu di bo edukashon òf eksperensia.”

Asina un èks studiante, ku ke keda anónimo pasobra ainda e ke bolbe bèk na Kòrsou, tambe ta bisa. Despues di un aña i mei el a bai Hulanda bèk pasobra e no por a kustumá ku e kultura di empresa lokal kaminda segun e ‘kosnan no tabata bon reglá’. Pero espesialmente su salario no tabata sufisiente pa paga su debe di estudio.

‘Komo ko-piloto mi no tabata gana basta pa paga mi debenan’- èks studiante

“Mi a hasi un estudio masha karu pa kua mi mester a tuma un fiansa serka un banko hulandes. E amortisashon tabata 800 euro pa luna, mas o ménos 1600 florin antiano. Esaki ta mes haltu ku e suèldu mínimo na e isla. Mi no tabata gana sufisiente pa mi paga mi debenan banda di di mi gastunan fiho, ounke mi tabatin un bon trabou komo ko-piloto. E banko mester a tene kuenta ku esaki durante di un aña., pero despues di un aña a eksihí pa mi bini Hulanda bèk.”

Achanty Damice-Thomasa despues di kaba su estudio di sikólogo di hoben a bini bèk na 2015. Den e añanan ku a sigui, el a haña un trabou partaim na Fundashon Protekshon di Mucha Kòrsou (Stichting Kinderbescherming Curaçao). Ounke ku e tabatin masha gana di traha fultaim, no tabata posibel pa traha mas tantu òf haña un kòntrakt fiho. Den e kuater añanan i mei ku a sigui, el a traha diferente trabou aserka pa tòg logra haña un salario fultaim. I esei tabata molesti’é.

‘Bo mes mester siña landa’- èks studiante Achanty Damice-Thomasa

‘Loke tambe a hasi falta na tur e kamindanan ku mi a traha, ta ku nan no ta invertí den edukashon pa trahadó. Di guia tambe mi a ferwagt mas. Apénas mi a haña intervishon òf feedback riba mi funshonamentu. Mi a eksperensiá ku ta tira bo den fòndu i bo mes mester siña landa.”

Minister di Enseñansa Marilyn Alcala-Wallé ta rekonosé e problema di e èks studiantenan, “E echo ku nan no por paga nan debe di estudio ta un problema ku mi ta tende hopi. Na prinsipio mester t’asina ku e studiantenan lo por paga nan debe segun ku nan por. Pero nos ta tende di e èks studiantenan ku no t’asina den práktika. Mi tin gana di investigá esaki, pasobra lo mi haña lástima si esaki ta un motibu pa hóben ku edukashon haltu keda sin bini e isla bèk. Nos por usa e konosementu ku nan tin bon.”