AMSTERDAM – E asesinato racista di e Curaçuleño Kerwin Duinmeijer (15) na 1983 no ta bisa e hubentud awendia mucho mas. Pero puntrando nan nan mesun experiencianan cu racismo na Hulanda y e storianan ta keda bin sin fin.
Javier (20) ta harta di su falta di conocemento di e storia di Kerwin Duinmeijer. “Esaki ta haci mi dolor, mi lo a atende e conmemoracio sigur sigur.” Javier mes a experiencia racismo y prehuicio na Hulanda.
‘Otro alumnonan blanco den mi klas, nan tabata haya menos straf cu ami’
“Ni importa con mi ta bisti, nan ta spanta y lo tin un opinion. Si bo ta di color, semper bo mester traha mas duro. Ya esey ta cuminsa na scol. Ora e otro alumnonan di color blanco tabata haci mala mucha, nan tabata haya menos straf cu ami.”
Javier – potret: Natasja Gibbs
Riba e mercado labora Javier tambe ta ripara rascimo pa motibo di su color. “Si mi kier avansa, lo costa mi mas trabou pa motibo di e prehuicio. Hende no ta confia bo. Ora bo yega laat, di biaha lo bisa esaki ta ‘tipico’ mientras si colleganan blanco ta bin laat, nan lo asumi algo a pasa. E privilegio aki mi no tin.”
‘Ora di busca stage, automaticamente nan ta tira bo riba e monton of bin cu un excuus fofo’
Mescos cu Javier, Mubarik (21) tambe ta experiencia situacionnan negativo riba mercado laboral pa motibo di su color. “Ora di busca un luga pa core stage, automaticamente nan ta tira bo riba e moton of duna bo un excuus fofo cu nan no mester di hende. Mientras nan tin un vacature.”
Mubarik – potret: Natasja Gibbs
Algo otro tambe ta hunga un rol: Mubarik ta moslim, ‘un combinacion dificil na Hulanda’, e ta conta. “Ora ami ta bisa mi ta moslim, hende no ta kere mi pasobra nan ta pensa cu un moslim no por ta preto. Nan no a tende di Malcolm X of Muhammad Al eora anto.” Pa motibo di e prehuicio aki nan a prohibi Mubarik di drenta un moskee un biaha.
‘Nan ta haci joke di puta y cocaina ora mi bisa mi ta di Colombia’
Hende ta irita Jay (19) ora nan bisa cu no tin racismo na Hulanda. “E ta mucho facil pa bisa cu e no ta existi pasobra bo mes no a experiencia esaki.” Pa motibo di su procedencia Colombiana, e ta haya remarcanan negativo, scondi como ‘joke’. “Nan ta bisa cu mi ta un puta of een usado di cocaina pasobra mi ta di Colombia.”
Jay – potret: Natasja Gibbs
Racismo na Hulanda ta hopi sutil, scondi den joke of pasobra nan ta nenga su amigonan preto di drenta club. “Hoben tambe ta hacie. Mucha muhe ta tolera homber blanco mas facil cu hende preto. Nan ta trata nan cu mas sospecho. Esaki pasobra e imagen cu medionan ta crea di hombernan preto.
‘Polis a detene y aresta mi sin motibo
Hesham (20) tambe ta tira culpa riba medionan como cu nan crea den comunidad mas prehuicio contra minoria. “Nan ta bisa mi hopi biaha: pero abo no ta manera bo ta mustra. Pero kico esey ta nifica?”
Hesham – potret: Natasja
“Mi ta corda ora mi laga mi barba crece un par di dia y con vies nan ta wak mi den tram manera mi ta un terorista.”
Pero esey no ta su experiencia mas grave.
“Casi m’a lubida, pero locual tabata mas erg ta ora polis a detene un amigo y ami na Harderwijk. Ora m’a puntra nan dicon, nan no a contesta. Locual a haci cu m’a nenga di mustra mi ID y asina nan a hiba mi den forma bruto na warda di polis unda mi mester a keda un anochi den cel. M’a casi lubida asina normal mi ta cuminsa haya esaki.”
‘Nos mester expresa nos mes mas, traha hunto y sostene otro’
E hobennan ta duda cu un dia lo tin un mundo sin racismo. “Tabatin racismo semper y no contra un rasa so”, segun Mubarik. “Pero bo por conscientisa hende di nan comportacion y impacto di esaki.”
Javier ta bisa cu no por busca e solucion den e sistema. “Netamente eynan bo ta haya e structuranan cu bo ta bringando contra. Anos mester expresa nos mes mas y defende nos mes. Pero nos por logra solamente si nos lo cuminsa colabora mas y sostene otro.”
Kico a pasa cu Kerwin Duinmeijer?Na 1983 Nico Bodemijer (16) a mata Kerwin (15) den e caya Damstraat. Hulanda a considera e asesinato bruto aki riba Kerwin como e prome asesino racista desde Guera Mundial II y tabatin un demonstracion masal na Amsterdam. |
