DEN HAAG – Si bo tin un debe di estudio serka DUO i bo ta biba den Área Karibense, bo no por konta ku un areglo di paga bèk adaptá na e ekonomia di bo isla. Minister Ingrid van Engelshoven (D66) ‘no ta haña nesesario pa adaptá e legislashon aktual na esaki’.
Si bo ta biba den e parti karibense di Reino normalmente bo entrada ta basta mas abou, bo tin ménos benefisio sosial i gastu kompletamente diferente ku na Hulanda.
P’esei èks studiante na e islanan ke un midimentu di kapasidat finansiero di e Servisio Ehekushon Enseñansa (DUO, Dienst Uitvoering Onderwijs) ku ta tene kuenta ku e sirkunstanshanan ekonómiko na nan propio isla. Pero esei ta ‘imposibel’ i ‘no nesesario’ e minister di Enseñansa hulandes ta bisa awe den un karta na Tweede Kamer.
Suèldu mínimo hulandes komo norma
Minister Van Engelshoven ‘no ta haña nesesario’ pa adaptá e lei i e midimentu di kapasidat finansiero pa e islanan pasobra esaki ta basá riba e suèldu mínimo hulandes. “En general esaki ta basta mas haltu kaba ku na otro pais.”
Ademas e minister ta bisa ku ‘ku un entrada bou di suèldu mínimo hulandes un èks studiante no tin nodi di paga nada bèk na DUO’. Na 2019 a establesé e suèldu mínimo hulandes riba 1635.60 euro bruto.
“Ke men saliendo for di e suèldu mínimo hulandes (mas haltu) esaki ta den bentaha di e èks studiantenan na Kòrsou”, Van Engelshoven ta bisa.
Den problema finansiero pa motibu di DUO?
Un otro keho di sigur shen èks studiante na Kòrsou ta ku nan a haña problema finansiero pa motibu di komunikashon difikultoso añanan largu ku DUO.
Den esaki nan ta haña sosten di minister di Enseñansa na Kòrsou Marilyn Alcalá-Wallé, ku na yüli a manda un karta urgente pa Van Engelshoven.
Prekupashon pa maneho di dùrwarder di DUO
Den e karta urgente pa Van Engelshoven Alcalá-Wallé a bisa tambe ku ta trata di ‘un liña no íntegro’ entre DUO i dùrwarder lokal.
“For di DUO ta hunga e wega asina ku e èks studiantenan ta resultá serka dùrwarder mésora. Nos no por skapa di e pensamentu ku tin un konekshon entre DUO-dùrwarder-Kòrsou”, Alcalá Walle a bisa Caribisch Netwerk luna pasá.
Van Engelshoven ‘no ta haña e kalifikashon ei hustu’ i ta sinti falta di un argumentashon pa esaki. E minister hulandes ta bisa ku ‘DUO ta empleá un dùrwarder solamente si tur kòrdamentu i ánmanen no a kondusí na pagamentu òf kontakto tokante un posibel areglo di pago’.
