WILLEMSTAD – E protesta di sentenar di hende den sentro ku a eksihí bahamentu di gobièrnu di Kòrsou, a kaba den disturbio, sakeo i un kantidat di destrukshon. Despues gobièrnu a instituí un toke de keda te djaweps meinta 6 or.
Hefe di kuerpo Mauricio Sambo ademas a entregá su retiro pasobra e no a laga protehá e edifisio di gobièrnu Fòrti sufisientemente kontra e demonstrantenan furioso. Entretantu a arestá seis demonstrante.
E grupo ku su lider aktivista Lon Mutueel, ku ta bisa ku e ta sali na defensa di hóbennan na e isla, ta rabiá pa motibu di e ekonomisashonnan di gobièrnu i ta preferá mira ku Hulanda ta intervení. Tambe e empleadonan di e kompania di prosesamentu di shushi Selikor, refineria Isla, Aqualectra, Brasami i ámtenarnan a djòin e protesta. Diferente sindikato a laga sa di no ta sostené e protesta aki.
Mutueel i tambe otro siudadano rabiá tin mas ku u siman ta hiba akshon. Por ehèmpel nan a blòkia tráfiko riba e konosido Julianabrug. Pero otronan ta usa e situashon pa hiba un protesta ménos pasífiko i ta barikadiá kayanan ku tayer di outo na kandela.
reportahe di Kim Hendriksen
Gas lakrimógeno i destrukshon
potrèt : Dulce Koopman
Serka e edifisio di gobièrnu finalmente polis a intervení ku gas lakrimógeno. Gruponan chikí di manifestante a sigui bai den sentro di siudat pa destruí kos. A sende un outo di polis na kandela i tambe a barikadiá kaya ku kandela.
Den e bario Otrobanda a sakeá pakus. Empresario na henter e isla a sera nan portanan pa motibu di disturbio i sakeo. Pasobra a destruí bùsnan tambe ABC a disidí di no kore mas anochi.
Dwergsteeg den e bario di Otrobanda – potrèt : Dulce Koopman
Promé minister Eugene Rhuggenaath ta papia di un ‘dia tristu’. E ta bisa ku na promé instansha a hasi palabrashon ku e lidernan di e protesta. Ora ku no a kumpli ku esaki a intervení.
“E medidanan di ekonomisashon ku gobièrnu mester a tuma ta imponé pa Hulanda. Nos mester ehekutá nan i sòru mantené trankilidat na e isla.”
Ménos salario
Bou di e demonstrantenan tabatin hopi empleado di Selikor. Esakinan a tende ku lo kita for di nan salario. Segun e direktiva di e kompania di shushi ta pasobra gobièrnu tin basta tempu kaba sin paga. Asina e kompania tin un debe di desena di mion. Awor e sèn a kaba i p’esei segun e maneho no por otro ku kòrta den e gastunan di personal i trabou.
