Diana Lebacs a bai laga nos. Sí despues di su morto a sali dos buki bunita di dje, un pa mucha i un pa hende grandi.
E aña aki nos mester a tuma despedida di e gran eskritor kurasoleño Diana Lebacs. E tabata eskritor, dosente, aktris i traduktor. Serka su promé bukinan e mes tabata pinta e ilustrashonnan. El a fayesé na edat di 74 aña.
Diana Lebacs
Lebacs a skibi 45 buki, berdaderamente pa kada grupo di edat. Dos bia el a haña premio. Na 1976 (komo úniko eskritor no oropeo) el a haña e premio hulandes pa buki di mucha Zilveren Griffel (ref di plata) pa su buki pa hóben ‘Nancho van Bonaire’ i na 2003 el a risibí e ‘Cultuurprijs van Prins Bernhard Cultuurfonds Nederlandse Antillen en Aruba voor Jeugdliteratuur’ (Premio di Kultura di Fondo di Kultura Prens Bernhard di Antia Hulandes i Aruba pa literatura pa hóben).
Lebacs a muri bai laga dos buki kompletamente nobo pa nos, ku e mes no a tene mas. Un novela ‘Dame van de Avond en het Berouw van Benaro’ (Dama di Anochi i e Kontrishon di Benaro) publiká pa kas di publikashon Knipscheer i e promé buki di prenchi karibense na kuater idioma pa mucha, ‘Pasenshi’, tokante e porko Pasenshi.
Diana su último deseo tabata pa publiká Pasenshi i partié bou di hubentut. Maria van Veen i Laurindo Andrea ku ta presidente di e Fundashon Edukashon pa Mucha Kòrsou, a primintié solemnemente ku esaki lo sosodé. Pa medio di donashon nan a kolektá dies mil euro i nan por a manda pakete di 25 buki pa tur skol di enseñansa primario, skol pa enseñansa spesial i biblioteka. I e ora ei ainda a sobra sèn pa fin di òktober lansa e buki ku un fiesta di mucha espektakular.
potrèt: Gilbert Barbara
E buki ta trata di pasenshi, Andrea ta bisa. E mésun pasenshi ku Lebacs mester a tene, ora el a haña sa ku e ta bai muri. E pasenshi pa laga bai, delegá i entregá, e ta bisa.
Un di su último bukinan
Último mensahe di Lebacs pa Kòrsou?
Serka ‘Dama di Anochi i e Kontrishon di Benaro’ e inklinashon pa buska Lebacs su último mensahe pa Kòrsou i mundu naturalmente ta grandi. E relato ta ta trata entre otro di un dòbel di promé minister. Ku e dòbel aki a hasi un eksperimento ku a lag’é bira un ‘Personalidat Super Positivo’. I e dòbel aki den sekreto ta tuma e lugá di e berdadero promé minister i di repente tur kos na e isla ta bai mihó.
E berdadero promé minister temporariamente ta bai e isla yamá Turtuga. Ei e ta haña kontrishon i ta bisa e persona prinsipal ku e lo no bolbe mas pa e isla. E sa ku semper e ta skohe pa kos malu. I e ta puntra: “Bo sa kiko lo pone Kòrsou bira salú atrobe? Ora malhechor manera ami komprondé nos mes asina bon ku di nos mes boluntat nos ta laga nos isla na pas i bai. Ora nos stòp di sabotiá bienestar di Kòrsou i di Yu di Kòrsou.”
E ora ei segun e Kòrsou atrobe lo ta un isla di sanashon i kurashon. Ta kiko Lebacs ke bisa: Kada sapatu tin su pia??
