Ta manera e komportashon di arubano di tira kos afó ta kambiando. Ta re-usa kos bieu mas frekuente i pakus di kos di segunda mano ta krese na e isla.
Un pakus di kos di segunda mano ku un enfoke ekstraordinario ta Super Thrift Charity Store Aruba. El a kuminsá ku benta di paña segunda mano, i awor a krese bira un pakus di resiklahe ku no solamente ke duna kos un di dos bida, sino hende tambe.
Edfra Johnson ta splika ku nan tin un otro fókùs ku e sobra ‘thrift stores’ na e isla. Asina ainda no tabatin un berdadero pakus di resiklahe.
“Pasobra nos a kuminsá krese, nos ta haña mas pregunta di hende ta kiko e konsepto ta eksaktamente. Awor hende ta komprondé e konsepto mihó i asina nan ta mas konsiente tambe ora nan duna algu.”
“Duna un blusa ta hasi e konsumidó konsiente di su kondukta di kompra. Banda di esei nan ta mas konsiente di e medio ambiente pasobra nos ta enfatisá re-uso. Duna un blusa tambe ta nifiká duna un otro hende un bida nobo i esei ta hasié ekstraordinario.”
Mas petishon pa yudansa for di tempu di e pandemia
E pakus ta un inisiativa di fundashon Adult & Teen Challenge Aruba kaminda Johnson ta lider di programa i miembro di direktiva. E fundashon kristian aki espesialmente ta yuda adulto i hóben ku problema di adikshon ku ta varia di droga te adikshon di telefòn, internet i asta porno.
Di e ganashinan di e pakus di resiklahe ta konstruí un sentro di akohida di 24 ora pa adikto. Nan ta spera di finansiá otro proyekto tambe ku esaki. E fundashon ta duna kurso di prevenshon manera kontra violensia doméstiko i depreshon. Tambe tin un programa di re-integrashon pa adikto ku ta dura 14 luna.
Tur esaki ta masha nesesario. E fundashon durante e epidemia di corona a ripará un oumentu di e kantidat di hende ku a mèldu, Johnson ta konta. Banda di hende hòmber nan ta mira mas i mas hende muhé i tiner ku ta pidi yudansa.
‘Ta kai lanta bèk’
For di e komienso di e programa di re- integrashon a yuda òf guia desena di hende. E fundashon tambe ta mira hende hala afó pa motibu di e programa estrikto ku guia di 24 ora. “Hende ta haña difísil pa pone e paso pa kambio, ta kai i ta lanta bèk.”
Johnson ta konta di e adikto Ricardo ku awor ta den treinen den e pakus di resiklahe. Sinku bia el a kai afó promé ku el a pasa e promé parti di e programa.
“ E ta un ehèmpel di kon difísil e kos por ta. Awor ta siñ’é kon pa forma parti di nos tim pa e mes por yuda otro hende.”
Di resiklahe pa ‘sentro di fishi sirkular’
“Nos ke yuda tur hende pero aworakí esaki no por ku un tim asina chikí. Nos ta trahando riba esaki awor”, Johnson ta bisa. Ku e programa di re-integrashon kaminda e adiktonan ta haña kapasitashon di mbo, nan mester a stòp temporariamente te ora ku e plannan nobo tabata kla.
Di e pakus di resiklahe na Oranjestad na final e fundashon ke traha un ‘sentro di fishi sirkular’. Esei ta nifiká traha den e pakus, pero tambe den e depósito. E sentro dia akohida pa adikto mester ta kla aki dos aña.
“Pa nos adikshon ta enserá, tur kos ku ta pone ku komo hende bo no por sigui krese”, segun Johnson. Pronto e fundashon tòg ta bai yuda kliente nobo.
Edfra Johnson tokante e resiklahe ku ta duna kos i hende un bida nobo (potrèt: Melissa Stamper)
