Den luna di Aprel pa di sinku bia e proyekto ‘Un Smail pa Kòrsou’ a tuma lugá na Sentro di Bario Wishi Marchena. E inisiativa aki, ku a start na Hulanda pa ’Smiles World’, tin komo meta prinsipal e mehorashon di kuido di salubridat di boka di mucha na Kòrsou ku kuido odontológiko preventivo.
E proyekto a pasa den un transformashon. En bes di laga mucha bai un ofisina di dentista, e higienistanan di boka, dentista i stazjèr awor aktivamente ta bai den bario pa grátis duna mucha informashon, kòntròl dental i pakete. E aña aki ta ehekutá e proyekto den kolaborashon ku ’Fundashon Salú pa tur’, ‘Federashon Otrobanda’ i Koninklijke Marine, ku ta manda bùs pa buska e muchanan den e barionan.
“For di e promé bia ku nos a organisá e proyekto kaba, nos a haña nos ku masha hopi mucha ku keho di doló. E ora ei nos tabata sa ku e nesesidat tabata masha grandi. Entretantu un 400 mucha ta akudí na e evento”, e ko-organisadó Denice Bezemer-Hoyer ta konta.
“E tempu ei nos a kòmbersá ku e minister di Salubridat (GMN), pero esaki a indiká ku e no por karga e gastunan aki, pues nos mes a hasi esaki numa. Nos a skohe pa hasi esaki pa tres aña i finalisá ku un rapòrt tokante e estado di higiena di boka serka mucha na e isla”, segun Bezemer-Hoyer.
Kolaborashon i nesesidat
E aña aki ta remarkabel ku hopi hende di habla spañó a akudí na e proyekto. “E aña aki pa promé bia nos ta kolaborá ku e fundashon Salú pa tur pa asina e yunan di persona indokumentá tambe por haña kuido dental”, Bezemer-Hoyer ta konta.
Marhainska Sakoetoe di Salú pa tur tokante e kolaborashon: “Nos a ripará ku hopi pashènt den nos konsultorio, i lástimamente mucha tambe, tin djente malu. Pasobra nos sa ku mayoria di nos pashèntnan no ta sigurá, nos ker a hasi algu preventivo. Pesei nos a djòin e proyekto aki.”
Fókùs riba prevenshon den odontologia
E énfasis di e proyekto ta riba prevenshon. Kompartiendo konosementu i oferta di akseso fásil na kuido dental, ta trata di kambia e persepshon den komunidat di Kòrsou pa salubridat den boka.
E dentista kurasoleño Eric de Brabander pa di dos bia ta presente durante e proyekto. E no ta spanta mas di e estado di kuido di boka serka e muchanan. E ta mira esaki tambe tur dia den su ofisina. Kon por trata ku esaki? “E di mas importante ta pa fluorisá e awa di bebe. Pa kada florin ku bo saka pa fluoride di awa di bebe, bo ta spar seisshen florin na kuido di dentista.
Resultado i progreso
Lisette van der Harst di Smiles World ta un di esnan ku a tuma inisiativa pa e proyekto, i ta presente pa di sinku bia. “Tabata un dia masha drùk, pero tambe un dia masha grasioso”, Van der Harst ta konta.
“Kada bia ta diferente. Tambe mi ta ripará ku tin mucha ta rekonosé mi di e añanan anterior. Asta tabatin un mucha hòmber ku aña pasá ker a saka potrèt ku mi, i e aña aki atrobe. Asina grasioso!
E higienista di boka huntu ku e tumadó di inisiativa Saskia den Hartog henter dia a kontrolá mucha. “Nos ta mira ku mas i mas mucha ta akudí na nos proyekto. Pero e kantidat di kolaborashon tambe ta krese. Pa haña sufisiente spònser e edishon aki tabata e reto di mas grandi atrobe, bo mester tin sufisiente hende ku por tradusí pa e higienistanan di boka i e dentistanan internashonal, tambe bo ke por duna tur boluntario kuminda i tur mucha un regalo.”
E evento na novèmber lo tuma lugá pa delaster bia den e forma aki. E proyekto ta sigui sí, pero lo no ta liá mas na un investigashon i lo tuma lugá un bia pa aña en bes di dos bia pa aña.
