Na Kòrsou Korte di Promé Instansha siman pasá a pronunsiá e bankarota di JetAir. Esei a sosodé riba petishon di e kompania aéreo mes. Ku esaki a terminá e kompania ku na novèmber 2019 a haña su pèrmit i ku nunka no a superá e medidanan di corona. Hopi pasahero ta perhudiká.
Kuater luna despues ku e kompania a kuminsá, mundialmente e pandemia di corona a estayá i a bula solamente bou di kondishon masha estrikto, e kantidat di pasahero mundialmente a baha i turismo kasi a para kompletamente. Nunka JetAir no a superá e sla ei.
Komienso difikultoso
Mirando bèk: e medidanan di corona ku hopi impakto a kousa un start difikultoso pa e kompania i JetAir no a logra traha ku ganashi. Pesei JetAir no por a soportá e invershonnan nesesario pa e mantenshon di su dos avionnan F70. JetAir tabata ofresé buelo di liña i di charter di bai bini pa e área karibense i Sur Amérika
Fayit
Pasobra e eksplotashon tin pèrdida, i e pèrdida di e promé kuater lunanan di 2024 ta Nafl. 2 mion, JetAir a disidí di pidi su mes fayit. E kuratórnan den deliberashon ku e direktiva a disidí di stòp e operashon kompletamente. Esaki segun JetAir ta nifiká ku por lo pronto lo tene e avionnan na tera i ku tanten ta anulá tur futuro buelo.
Korte a apuntá mr. C.M. van Liere i mr. R.J. Vriezen komo kuratòr. Den e fase di komienso aki nan lo dirigí nan mes prinsipalmente riba informá e pasaheronan, trahadónan i otro interesado, inventarisá e biennan i investigá si un start nobo di JetAir ta posibel riba término kòrtiku.
Pasahero rabiá
Djamars mainta, 18 di yüni, pasahero ku a risibí un email di JetAir den kua tabatin pará ku a anulá tur buelo i no ta paga sèn di téket bèk, a bini huntu dilanti di porta di JetAir na Snipweg. Polis a akudí pa mantené e situashon bou di kòntròl.
E fayit a perhudiká hopi hende, entre nan sinku tim di softball di Kòrsou ku mester a sali pa un torneo grandi na Sint Maarten. Tambe tabatin un grupo grandi di 75 hende ku lo a bai Colombia di vakashon.
E korant Extra ta skibi ku tin mas tipo di relato tristu asina di biahero. Un señora ku u téket den man a deklará dilanti di porta di e ofisina mayó ku ora el a kumpra su téket djaluna anochi lat, a sigur’é ku e buelonan lo sigui normalmente. Tambe tin hopi pasahero pegá den eksterior.
Diferente pasahero djamars a bai gobièrnu pa pidi yudansa. Promé minister Gilmar ‘Pik’ Pisas tabatin un enkuentro ku seis persona ku ta representá e grupo di biahero. El a laga sa ku Konseho di Minister lo mira si por haña solushon pa e pasaheronan perhudiká.
Hopi pasahero ta haña ku JetAir por a laga sa mas trempan ku tabatin menasa di un fayit i ku nan no mester a sigui bende téket te na delaster dia, asina nan ta bisa.
Kleim
E pasaheronan rabiá na e ofisina mayó a tende ku nan por entregá un kleim. Riba e website di JetAir ta publiká un Q&A ku mas informashon. A habri e adrès di email creditors.jetair@hbnlawtax.com pa entregá kleim di pasahero i otro kreditor.
