WILLEMSTAD- “Loke a sosodé e siman aki ta di kondená, pero e agresividat i e biramentu asina duru di polítika no ta aki so.” Asina analista polítiko Gilbert ‘Gibi’ Cijntje ta bisa. E ta reakshoná riba e wanta ku parlamentario Jacinta Constancia (MFK) a dal su kolega Giselle Mc William (MAN) den parlamentu. Segun Cijntje nunka promé no a yega asina leu na Kòrsou.
E imágen di enduresementu i agresividat, espesialmente ku palabra, pero tin bia mas leu, ta kuadra si ku e trènt mundial, Cijntje ta bisa. Wak Hapon, pero wak Oropa oriental tambe, Suramerika i asta Estádos Unídos. Tur kaminda e wega ta bira mas duru.”
Rònt di añanan setenta tenshonnan a subi haltu na Kòrsou. E tempu ei tabatin Eilandsraad ainda. “Diferente hende a pega ku otro i par’un pinga golpi a kai. Na final esaki no a sosodé.”
Polítika a kambia
Aktivista polítiko Stanley Brown den tempu di añanan setenta tabata Miembro di Staten. Dia 30 di mei 1969 e tabata envolví den e insurekshon na Willemstad ku a kuminsá komo un welga di trahadónan di refineria Shell i a kaba ku Punda i Otrobanda na kandela. Tabata un momentu ku e relashonnan na Kòrsou a bòltu i di konsientisashon i emansipashon di antianonan. Pa motibu di e insurekshon huntu ku Amador Nita i Wilson Godett el a lanta e partido FOL (Frente Obrero Liberashon 30 di mei)
Tòg e inkietut di e tempu ei segun e no por kompar’é ku awendia. “E wega polítiko ta kompletamente diferente. Hende ku e tempu ei tabata miembro di Staten, tabata dosente manera ami i otro siudadano ‘normal’. Awor tin hende aden ku ta rikisimo i e siudadanonan normal no tin nada mas di bisa.”
Esaki tambe por mira den otro pais. “Wak Estádos Unídos. Henter senado ta konsistí di multimionario.” Brown ta konta ku komo miembro di Staten e tabata risibí 600 florin pa luna, banda di esaki e tabatin un trabou normal. Esaki tabata konta pa tur miembro di Staten. “Bo mester ker a bira miembro di Staten for di idealismo. Entre tantu a subi e suma hasie 12.000 pa luna. E ora ei bo ta haña un otro tipo di polítiko.”
200.000 pa asiento
Segun Brown un hende sin plaka no por logra mas tampoko. Gastunan di un asiento e ta kalkulá ta sigur 200.000 pa asiento. E kos ta kuminsá ku 700 voto pa por partisipá. “Un hende ke vota pa bo si, pero e mester di dos tayer nobo òf algu otro. Mester tene un fiesta, mester di transpòrt pa bai e fiesta, asina bo por sigui. Tur huntu e kos aki por sali bo 200 mil pa asiento i un hende mester paga esaki.”
Brown ta enfatisá ku na Hulanda ta kubri e gastunan entre otro for di e kontribushon di e miembronan di e partido i di supsidio. Aki nò. “Partidonan ta dependé di e élite i ta nan ta paga i disidí e vishon. Miembronan di Staten no ta liá na un partido, pero na un entrada i nan ta kambia di partido den un fregá di wowo.”
