WILLEMSTAD – Outonan pará meimei di kaya òf ku ta blòkia salida di un kas. Na Telamonstraat na Vredenberg ta kos di tur dia. E kousa ta un kas di studiante ku 45 lugá pa biba, pero ku solamente 8 lugá di parker dilanti kas. Habitantenan ta hartá i nan mes ta tuma medida pa para e ‘parkermentu brabu’ aki.
“Semper aki tabata un bario dushi i trankil”, Ranfor Nijdam ta konta. For di 1984 e ta biba na Telamonstraat na Vredenberg. Su mama ta biba dilanti dje i su kuñá algun kas mas leu.
E sosiegu aki segun Nijdam a stòp ora algun aña pasá a konvertí e kas band’e dje den un bibienda di studiante ku 42 kuarto i tres studio. “E studiantenan ta fiesta i bebe hopi”, Nijdam ta konta. “Semper tin boroto.”
Hopi outo, tiki lugá di parker
Pero e problema di mas grandi ku e kas di studiante ta kousa ta molèster di parker. Daniel Staal, e doño di e kas di studiante, ta rekonosé e problema di parker: “Kada grupo nobo ku yega mi ta konta ku e bisiñanan no gusta si parker den nan porta, den e kas tambe tin mapa kologá kaminda ta mustra eksaktamente kaminda nan no por para.” Segun Nijdam esaki no ta sufisiente: “Un bisiña normal bo por mustra riba esaki. pero si ta kada seis luna bo tin bisiña nobo, bo n’ ta kaba nunka.”
Tin bisiña ta spùit e lèternan ‘NP’(No Parker) riba outonan. Potrèt: Eva Vloon
Piedra i spùit fèrf
Tin bisiña a pone piedra riba e asera dilanti nan kas pa asina pone ku no por parker ei. “Pero esei no ta yuda nada’, Nijdam ta bisa. Awor nan ta djis para meimei kaminda numa. Masha peligroso. P’esei otro bisiña ta bai un paso mas leu: nan ta susha e outo ku fèrf ku e lèternan ‘NP’.
Esaki serka hopi studiante no ta kai bon. “Ku e akshonnan aki mi ta pèrdè rèspèt pa mi bisiñanan mas lihé ku mi lo bai tene kuenta ku nan”, un habitante aktual di e kas ta bisa. “Mi ta komprondé ku ta tehi si parker den bo porta di kas, pero unda mi mester laga mi outo anto?”, un otro ta puntra.
‘No ta un bon lugá pa un negoshi asina’
Segun Staal e solushon ta pa keda rekordá e studiantenan riba e reglanan. “Lo mi tin gana di pinta espasio di parker riba kaya. Ma esei no ta pèrmití asin’asina.” Nijdam ta pensa diferente. “Un bario di biba no ta un lugá pa un negoshi asina. E úniko solushon ta pa e hürmento di kamber stòp. Si mi tin basta plaka mi ke bai hiba un kaso. Te e tempu ei lo mi konformá mi. Ma no ta agradabel si.”
