WILLEMSTAD- Boka Asension na promé instansha no ta mustra diferente di otro ora: un playa trankil di santu rondoná di baranka. Pero, si bo wak bon, bo ta mira ku plamá rònt di henter e playa tin pida pida chikí di un material manera bals. Ta e restonan di zeta ku despues ku na e refineria Petrotin na Point-a-Pierre na Trinidad un tanki di warda zeta a rementá, a drif riba laman bini kosta di Kòrsou.
Anteriormente kaba tabata konosí ku e zeta a yega Aruba i Kòrsou, pero kuminsamentu di e siman aki a haña zeta ku a yega kosta pariba di Kòrsou i na Klein Curaçao. Esaki ta mal notisia pa morkoi, piská i otro animal i mata den i rònt di laman. Pa evitá daño, diferente organisashon di naturalesa ku ayudo di boluntario i gobièrnu ta limpiando e zeta na e playa. Djaluna un grupo a bai Klein Curaçao i djamars lo limpia Boka Asension i Boka Mansaliña.
E zeta na Boka Asension ta difísil pa limpia, pasobra ta pida pida masha chikí. Potrèt: Eva Vloon
Pida pida chikí di zeta
Sabine Berendse di Sea Turtle Conservation Curaçao ta kambia henter su planifikashon di e siman aki pa e por kordiná e boluntarionan i yuda limpia e playanan. E ta konta: “Ayera mi tabata na Klein Curaçao i ei tabatin mancha masha grandi di zeta diki. Aki ta yen di pida pida chikí, ku hopi bia ta pegá na yerba di laman ku a laba bini kantu. Esei ta pone ku ta hopi mas difísil pa limpia.”
Ora kaba di kita e zeta for di playa, ta saka e santu i e matanan afó. Djei ta hib’é refineria Isla. No ta konosí si solamente nan ta bai kima e zeta, òf lo bai us’é di nobo.
Emoshonal
Berendse tin añanan kaba ta empeñá pa naturalesa na Kòrsou. Asina via Carmabi e tabata envolví den un proyekto pa limpia plèstik dilanti kosta di Klein Curçao. “P’esei ayera mi tabata basta emoshonal ora m’a mira e playa ku mi a trata di limpia huntu ku mi koleganan, tapa ku mancha sushi pretu.
Tin chèns ku mayan tin zeta nobo atrobe ku lo yega kosta. P’esei Berendse i su koleganan ta keda vigilá e playanan bon e siman aki. Boluntario por mèldu na e página di Facebook di Sea Turtle Conservation Curaçao pa yuda limpia e zeta.
