WILLEMSTAD – Dia 8 di novèmber último, hospital Atvènt a risibí un atvertensia di Inspekshon di Salubridat, pa no permití parteranan independiente atendé kliente sin un akuerdo di atmishon aprobá. Despues SVB tambe a partisipá den un karta, ku nan no lo paga servisionan ku nan a ehersé ilegalmente na Atvènt.
Un reportahe di Deya Mensche
Esaki ta un porta más ku ta sera pa parteranan Agnes Cobelens, Dinairy Hart-Dossett, Karin Stomp i Peggyan Jordan. Despues di a tumá nota di e desaroyo akí, e kuater parteranan a bati alarma i a tene un rueda di prensa ayera mainta. Presidente di SEDA, Meyrtha Leetz – Cijntje, tambe a asistí e enkuentro, huntu ku vários kliente na estado ku a mustra nan solidaridat ku e parteranan.
Ilegalmente
Jan Huurman, inspektor di Salubridat, ta haña ku e parteranan ta hungando ku e salú di e muhénan na estado i ta usa nan komo rehen. “Nos ta konsiderando pa tumá medidanan adishonal”, Huurman a deklará den un kòmbersashon telefóniko. E inspektor a indiká ku hospital Atvènt a haña un atvertensia, paso a diskubrí ku partonan tabata tumá lugá ilegalmente den e klínika na Damacor pa parteranan independiente, sin un akuerdo di atmishon ku a akordá adelanta pa Inspekshon. Tambe el a tilda Atvènt di a entregá e akuerdo di atmishon despues ku Inspekshon a duna su atvertensia.
Di nan parti, e parteranan ta ninga redondamente di a trata kliente na Atvènt promé ku 2 di Novèmber. Segun partera Stomp e promé parto a tuma lugá den mardugá di 4 di novèmber, i ta enfatisá ku e informashon ku Inspekshon tin ta robes.
Pòrtrèt: Deya Mensche
Derechonan di hende muhé
Ku e atvertensia akí, SEDA i e parteranan ta di opinion ku e derechonan di e muhé pa mantené e opshon pa determina su trayektoria di embaraso ta keda violá. Segun e parteranan lei ta protehá e derechi di e muhé pa determiná unda e ke duna lus i últimamente tin e eskoho final ku kua partera e ke traha. Pa SEDA, ku ta para pa derechonan di hende muhé i su famia, e situashon aktual ta unu hopi lamentabel. Tambe SEDA kièr spièrta e muhé pa konosé su derechi i no keda intimida. Según Leetz – Cijntje, esaki tin implikashonnan serio pa futuro pa tur partido involukrá, en partikular na e deber di kuido ku e partera tin.
Dr. Huurman di su partí ta enfatisá ku e partera independiente tin e libertat pa atendé su kliente na kas, mand’é Kraamkliniek, of transferí nan pa otra partera. Tambe Huurman a indiká ku nan lo studia e akuerdo di atmishon ku Atvènt na su debida tempu i no lo permití e parteranan pone preshon. “Nos ta hasí nos trabou mane debe ser i no lo permití ku e parteranan ta tumá nos komo rehen”, ela konkluí.
Minister Camelia-Römer
Dia 13 di novèmber, e parteranan i SEDA a manda un karta na minister Camelia-Römer pa intervení den e situashon akí, kende ya a indiká den algun medio di komunikashon ku e lo no entremete den proseso di Inspekshon.
