THE BOTTOM – “A primintí nos hopi kos i mi a bai tur reunion na stathùis. M’a kansa di reunion na stathùis i keda drei rònt asina. Mi mester mira akshon! Ta bon si nos sinta papia pero aworakí laga nos papia ménos.
E reunion na stathùis ku a tene e siman aki na Saba a resultá den reakshon rabiá di Sabanonan. Tòg no tabatin hopi hende presente. A organisá e evento pa motibu di e bishita di e presidente di e Instituto Hulandes pa Derecho Humano, Adriana van Dooijeweert. El a bishitá Statia i Bonèiru tambe pa investigá e situashon di derecho humano.
“Bida ta masha masha duru aki”
E tres kehonan prinsipal na Saba: kosto di bida haltu, falta di kas adekuá ku preis rasonabel i falta di konosementu di derechonan den e sistema di kuido di salú. “Bida ta masha masha duru aki”, Van Dooijeweert a bisa.
Esther van Weele, Konsehero di LLM Policy di e Instituto Hulandes di Derecho Humano tambe tabata presente na e reunion na stathùis djaluna pasá. El a konfirmá e kehonan. “Nos tabata di shòk di loke algun hende a konta nos, espesialmente tokante e konsekuenshanan di e echo ku legislashon importante ku ta garantisá un standart adekuá di biba no ta aplikabel na Saba, Sint Eustatius i Boneiru.
“I tambe e echo ku ta parse manera ainda no tin sufisiente komprenshon na Den Haag tokante kiko ke men pa biba riba un isla chikí ku práktikamente niun posibilidat pa sali for di e isla por ehèmpel pa un ekskurshon di skol.”
“E promé problema pa kuminsá kuné ta e pobresa ekonómiko”
Un habitante emoshonal tambe a bisa na e reunion na stathùis: “Mi a bisa esaki na 2012 ora Eerste i Tweede Kamer tabata aki, ku mi tin bèrgwensa di ta un hulandes oropeo mirando kon ta goberná e islanan. E promé problema pa kuminsá kuné ta e pobresa ekonómiko. Mi sa ku mi empleadonan mester traha dos òf mas trabou pa sobreviví. Mi tin bèrgwensa ora nos Sekretario di Estado di Asuntunan Sosial bisa ku awor nos tin sèn pa kumpra fèn.”
Van Weele ta komentá: “Nos ker a bisa e hendenan na Saba ku nos t’aki pa nan i gustosamente nos ke hunga un papel den e proseso di haña solushon konkreto pa asuntunan di derecho humano manera kas, kuido di salú i akseso na hustisia en general.”
Salbaguardiá derecho humanoE Instituto di Derechi Humano di Hulanda independiente ta esun ku mester salbaguardiá derecho humano. E tin outoridat na Saba, Sint Eustatius i Boneiru tambe. E Instituto ta konsistí di 9 miembro di komishon i tin un staf profeshonal di mas o ménos 55 hende. Defensor di Pueblo Nashonal tin outoridat si ta trata di keho kontra gobièrnu. |