DEN HAAG – Tweede Kamer na Hulanda a reakshoná spantá di e rapòrt di Amnesty International riba e manera ku Kòrsou ta trata refugiadonan venezolano ku ta buska asilo. Kòrsou ta violá derechinan humano, e organisashon pa derechi di hende ta indiká.
Sèlnan muchu yen, falta di privasidat, higiene pésimo, falta di kama i muchanan refugiá lòs di nan mayornan. Pa kolmo no por pidi asilo, un rapòrt krítiko di Amnesty International ta konkluí.
‘Gobièrnu hulandes negligente muchu largu’
E miembro di Tweede Kamer pa D66, Maarten Groothuizen, ta reakshoná ‘spantá’. “Nos ta hopi preokupá ku e manera ku ta anda ku e refugiadonan venezolano na Kòrsou. Separá mucha di mayor ta algu inakseptabel.”
GroenLinks tambe ta haña ku Hulanda mester aktua awor. Segun e partido den oposishon e gobièrnu hulandes ‘tabata negligente pa muchu tempu’ ora ta trata di ’proseduranan honesto i hustu pa asilo’ na Kòrsou.
Kabinete hulandes ta mustra riba Kòrsou
Amnesty ta haña ku Kòrsou i Hulanda tur dos mester ‘asumí responsabilidat’. Den un reakshon, e kabinete hulandes ta mustra riba e gobièrnu di Kòrsou i ta laga sa ku e rapòrt ta indiká e problemanan ‘di forma enfátiko’. “Maneho di imigrashon ta un asuntu di pais. Esaki ta nifiká ku ta Kòrsou mes ta responsabel pa e ehekushon di un maneho migratorio adekuá.”
André Bosman (VVD): Polítika riba e isla ‘a laga bastante kos para’. E partido di oposishon SP ta papia di un situashon ‘hopi serio’ riba kua Hulanda por hañ’é ta duna kuenta i rason internashonalmente. “Pero nos por ofresé yudansa solamente si Kòrsou ta apresiá esaki i ta laga sa ki tipo di yudansa mester”, segun e miembro di Tweede Kamer Ronald van Raak.
Debate den Tweede Kamer tokante Kòrsou
Djamars awor e ministernan hulandes lo mester duna nan reakshon verbal riba preguntanan di Tweede Kamer. Asina D66 ke sa kon Hulanda lo por yuda Kòrsou ‘garantisá e derechinan fundamental di e refugiadonan’.
Pa djarason tin un debate ku sekretario di estado Mark Harbers (Hustisia i Seguridat) planiá. “Mi ta bai pidi e sekretario di estado pa tuma akshon inmediato pa kaba ku e abusunan na Kòrsou di forma duradero”, e miembro pa GroenLinks Bram van Oijk ta anunsiá.
