DEN HAAG – Cuater dia largo e parlamentarionan di Aruba, Corsou y Hulanda a reuni riba e futuro di Reino. Sinembargo, kico ta e beneficio di e encuentronan aki?
Den e hal di Eerste Kamer, e sala parlamentario mas bieu di mundo, nos ta papia cu Marisol Lopez-Tromp (POR) di Aruba. E ta na haltura di e opinion publico cu ta exisisti riba e encuentro interparlamentario di reino (IPKO). Biahamento den business class, compensacion financiero, nochinan den hotel. E ta costa basta y no ta dunando suficiente resultado concreto.
“Antes e tabata asina”, Lopez-Tromp ta bisa. E tin mas cu 20 aña den politica y ta un di e miembronan cu tin mas aña sinta den parlamento. “Antes IPKO tabata mas tanto un plataforma pa bringa pa relacionnan estatal. Den e ultimo añanan el a crece den algo mas: nos ta buscando e colaboracion.”
E delegacion Rubiano: Marisol Lopez_Tromp (POR) den deliberacion cu Rocco Tjon (MEP) den Eerste Kamer – foto: John Samson
“Pero pa politiconan na Den Haag tuma decisionnan corecto, bo mester mustra nan e berdad di con e ta na nos islanan. Esaki tambe bo mester haci cara cara”, e ta haya. “Y manera nan ta critica nos, parlamentarionan di Hulanda tamba ta haya comentario ora nan ta bin nos banda.”
Antes
Ultimo añanan IPKO tabata marca cu incidentenan. Miembro di PVV Hero Brinkman a acusa e minister Rubiano Croes di ta un gañado y asina delegacion di Hulanda a mand’e cas.
Ronald van Raak (SP) tabata di opinion cu Helmin Wiels (PS) defunto mester papia mas positivo di Hulanda, despues nan a kita 1 biyon euro di debe di Corsou.
Y con a bay e aña aki? “No tabatin bringamento y asina tur cos ta caba lihe. Mi no ta haya cu e biaha ki e midi ta poni halto eora”, asina Van Raak ta comenta. “Mester frega pa nos tuma pasonan hunto.”
Tras di cortina
Locual esunnan cu ta sigui e livestream pa publico no ta mira ora e reunion oficial ta para, ta cu diferente miembro di e delegacionnan di e islanan y Hulanda ta busca otro den gang di Tweede Kamer sea den e restaurant pa miembronan den Eerste Kamer.
Nan ta papia den horea y evalua con e otro partidonan nan pensamentonan ta riba cierto asuntonan. Colaboracion entre e parlamentonan ta e enfoke awor cual tambe nan ta confirma durante e conferencia di prensa.
“E ta hopi importante pa nos wak otro den wowo cierto momentonan y bisa: tende, di kico nos ta papia realmente?”, asina Antje Diertens (D66) ta bisa. Su relacion cu e islanan a ‘mehora siguramente’ pa motibo di e encuentronan, e ta haya. Un ehempel con cos ta bayendo den bon direccion ta e noticia cu D66 a afilia su mes como partido ruman di e partido Rubiano MEP cu ta den gobernacion awor.
Pero e ta duna su frutanan?
Banda di ‘bon contacto’, IPKO a mehora hopi como cu e nivel di contribucion di parti di e islanan a subi, segun Diertens. “Awor e ta bay mas riba echonan substancia pa cientifica y cifranan di CBS.”
William Millerson (PAR) tambe ta haya cu e intercambio di informacion entre e parlamentonan a mehora hopi. Asina e islanan siguramente na e IPKO actual ta sinti cu nan a ricibi mas ‘siguransa y siguridad’ di parti di nan coleganan di Hulanda, dunando sosten pa atende e crisis di refugiado Venezolano.
Su colega di Corsou, esta Giselle Mc William (MAN) tambe ta papia di un ‘bon colaboracion’, pero: “Ami no ta asina hopi entusiast, pasobra mi ta sinti cu a bira tempo pa nos pone topiconan mas pisa riba agenda.”
“Nos a bay bishita Rotterdam Zuid por ehempel”, Mc William ta conta. “Ami a mira con e bario completo a mehora y muchanan ta bayendo exitoso. Esaki ta costa cienes di miyon euro. Nos no tin e fondo ni e experticio tin biaha. Con eora Hulanda por traha hunto cu Corsou riba e tereno aki?”
E delegacion Rubiano: Ricardo Croes (RED) ta delibera cu su colega Marlon Sneek (AVP) – foto: John Samson
Reunion parlamentario sin forsa
Ricardo Croes (RED Democratico) di Aruba, tambe ta positivo. “Pero”, Croes ta bisa, “palabracionnan cu nos ta haci akibanda, ta keda no oficial hopi biaha. Nos ta traha duro pa yega na palabracionnan durante e encuentronan. Pero na Den Haag nan ta haya poder solamente ora Tweede Kamer mes ta bin cu un mocion despues. Esaki mester cambia.”
Ausencia di parlamentarionan
Algo cu ta keda remarcabel, ta e ausencia di miembronan di e delegacionnan durante reunionnan. Aruba si a participa na tur, pero varios miembronan di Corsou – kende a biaha specialmente pa Den Haag pa participa na e encuentronan – no a presenta tur ora.
Miembro di Tweede Kamer Van Raak ta ripara cu pa hopi miembronan di e islanan Caribense IPKO ta considera como un ‘obligacion’. Millerson kende ta presidente di parlamento di Corsou actualmente no por duna un motibo dicon tabatin miembronan ausente.
Unda Sint-Maarten a keda?
Mientras Corsou, Aruba y Hulanda ta buscando colaboracion, e parlamentarionan di Sint-Maarten no a presenta e aña aki. E motibo? Pasobra nan mester trata nan presupuesto.
Miembro di Tweede Kamer André Bosman (VVD) ta bisa cu e ta lamenta esaki hopi. “Esaki ta algo nan por a planea miho pues e ta nan escogencia pa keda afo. Fuera esaki, ya nan ta laat cu nan presupuesto, tipico.”
“Ami ta sinti falta di e contacto. Ora parlamentarionan ta haya cu Hulanda ta interveni mucho pisa, bin papia. Bin combersa cu mi y no den corant”, Bosman ta bisa. “Cos mag di frega, pero nos tambe ta bay bebe koffie, lunch hunto y anochi dal un cerbes por ta. Esaki por tambe ta e manera con nos por sali hunto for di asuntonan asina.”
