WILLEMSTAD – Poko dia ei a atraká Sander* den su kas, “nan tabata hóben lokal, nan tabata nan dos i masha hóben”, e ta konta ainda poko den shòk.
“Mi a kaba di yega kas anochi lat i mésora nan a atraká mi. Ounke mi tin dos kachó masha grandi nan por a dal bai numa. Nan a hiba mi direktamente pa mi kamber di drumi kaminda mi tin mi seif. Nan tabata sa eksaktamente unda nan mester a bai. Nan a bai ku e kontenido di e seif. Espesialmente algun oloshi. Ounke mi a sufri algun leshon leve di e bringamentu, mi no tabatin nada. Pero mi a pèrdè mi sintimentu di seguridat si, i esei bo no por kumpra bèk”, segun Sander.
E hóbennan tin e mésun karakterístikanan
Anualmente 74 porshento di atrako ta kometé pa hóben di 25 aña òf mas hóben, esaki ta sali for di sifranan di e Atrakoteam di Kuerpo di Polis Kòrsou (KPC). Pa kiko ta nèt e mucha hòmbernan hóben aki ta sensitivo pa e tipo di delito aki?
Viandrelica Narcisio
Viandrelica Narcisio ta traha na rehabilitashon sosial hubenil. El a hasi un sondeo chikí for di e failnan di e atrakadónan. E ta ripará ku hopi di e hóbennan tin e mésun base. Hopi bia nan ta di famia ‘multiproblemátiko’, hopi bia e tata no ta presente i e promé karakterístikanan di kondukta desviante ta ekspresá nan mes for di edat hóben na skol. E hóbennan hopi bia no por sigui e enseñansa bon, sea pa motibu di un limitashon intelektual òf nò, i hopi bia nan ta bini di un ambiente kaminda kondukta kriminal ta e norma.
Señalá mas aktivo
“Na Kòrsou ainda no ta señalá e tiponan di hóben di riesgo aki sufisientemente. E diferente instanshanan ainda no ta koperá optimalmente i asina ta ripará e kasonan aki muchu lat.” Esaki Thyrza Girigorie ku a traha komo kordinadó na ‘Project Top C’, un proyekto ku ta guia hóben èks detenido ora nan drenta komunidat bèk, ta bisa.
“Lo mester trein maestro i dosente pa kapta e señalnan aki na tempu, i lo mester bini un sistema kaminda por mèldu si tin prekupashon pa un alumno”, Girigorie ta haña. “E ámtenar di enseñansa obligatorio mester traha mas pro-aktivo pa buska e hóbennan aki mas aktivamente si nan ta kore peliger di kai for di e sistema.”
Atrako ku arma ta oumentá
Clarelli Hato-Willems ta e fiskal di kaso di atrako. “E kantidat di atrako den kas di biba segun e último sifranan ta oumentá atrobe. Ta atraká hende anochi den nan kas, tin bia na un manera masha violente. E chèns di gara nan ta relativamente chikí, pasobra nan ta bisti maskarada i no por rekonosé nan”, segun e fiskal.
E sifranan ta mustra tambe ku e mayoria di e atrakonan ta mucha hòmber masha hóben ta kometé nan. Mayoria di e perpetradónan ta entre edat di 13 pa 25 aña. Asina aña pasa di e 43 detenshonnan 32 mucha hòmber tabata mas hóben ku 25 aña, i esei ta 74 porshento.
‘Kasi nunka loke nan hòrta no ta hopi, pero e daño si ta hopi mas grandi’
-fiskal Clarelli Hato-Willems
E sifranan di e añanan anterior tambe ta mustra esaki. “E grupo aki di mucha hòmber hóben ta konta den korte ku mayoria tempu nan no tabatin sèn i nan ker a kumpra kos karu manera un telefon nobo. Nan mester di plaka lihé pero nan no tin entrada. E ora ei na ta skohe pa e manera -pa nan- mas fásil i nan ta atraká un kas òf por ehèmpel un toko chines. Loke nan haña mayoria bia no ta hopi, pero e daño ku nan ta kousa, físikamente i emoshonalmente, si ta grandi”, Hato-Willems ta konta.
Minister di Hustisia Quincy Girigorie a indiká ku pronto e lo bini ku un plan nobo di enfoke pa baha e kantidat di atrako.
*E nòmber ta konosí serka redakshon
