ORANJESTAD – Fundacion Lisette Gomes ta subi caya atrobe dia 21 di februari pa protesta contra loke nan ta sinti ta sentencianan mucho cortico pa abusadorban sexual di mucha. Lisette Gomes ta conta Ret Karibense cu desde nan ultimo protesta aña pasa hopi a wordo priminti dor di gobierno di Aruba, pero nada a wordo cumpli.
Scucha aki e entrevista di Ariën Rasmijn cu Lisette Gomes
E biaha aki e manifestadornan lo bay oficina di Ministerio Publico cu e proposito di entrega un manifiesto na Procurador General. Segun Gomes e manifiesto lo menciona casonan cu ainda no a wordo resolvi of te hasta trata dor di Husticia. E fundacion tambe tin e intencion di organisa un otro protesta despues die dia 21, pero e biaha aki serca Corte, cu e intencion di pidi hueznan pa duna castigonan mas pisa na abusadornan di mucha.
Lisette Gomes entregando su manifiesto durante e protesta na Bestuurskantoor y parlamento di Aruba aña pasa. Foto: Ariën Rasmijn
‘Nada a cambia’
Riba 27 di April aña pasa a tene un protesta dilanti Bestuurskantoor. Segun Lisette Gomes gobierno a priminti cu instancianan cu ta duna ayudo na victimanan di abuso sexual lo haya mas subsidio y cu lo bin cu un ‘kinderombudsman’. Esaki sinembargo no a pasa te dia di awe. Tambe no tin un asina yama ‘meldcode’, cual ta un tipo di protocol specifico cu e proposito di colecta y documenta pruebanan y cu entre otro ta inclui uzo di un dokter di confiansa designa specificamente pa e tipo di casonan aki.
Aruba ainda no tin un dokter asina y segun Lisette Gomes te hasta tin casonan na unda muchanan cu a wordo abusa sexualmente no ta mira un dokter te dos pa tres siman despues cu e abuso a tuma lugar.
