WILLEMSTAD – “Mester depolitisá e instituto gobernadó i evitá e persepshon ku tin aworakí ku gobernadó ta privilegiá sierto interesnan polítiko i ekonómiko di Hulanda. E promé paso ta kita nombramentu di informadó i formadó for di gobernadó i laga esaki den man di parlamentu meskos ku Hulanda a hasi”. Esaki ta e konklushon ku analista polítiko Profèsòr Dòktor Gilbert ‘Gibi’ Cijntje ta saka for di lokual a pasa dia 12 di febrüari último.
Riba e dia aki parlamentarionan Melvin ‘Mac’ Cijntje i Sherwin Leonora di Pueblo Soberano (PS) a kita sosten for di gabinete Koeiman i a bai djòin ku partidonan di oposishon enkabesá pa MFK pa forma un gobièrnu nobo. E motibu di e kiebro tabata un desakuerdo ku a surgi entre e frakshon di PS i minister Suzy Camelia-Römer (PNP) tokante e lei di zonifikashon.
Gibi Cijntje den kòmbersashon ku José Manuel Dias
Mayoria di 11
Riba e mesun dia aki un grupo di 11 parlamentario den oposishon a firma un karta indikando ku tin un mayoria den parlamentu i ku por forma un gobièrnu nobo, pero gobernador a opta pa un petishon di gabinete Koeiman pa disolvé parlamentu i konvoká elekshonnan pa dia 28 di aprel próksimo. Esaki no opstante ku e petishon di e 11 parlamentarionan a drenta hopi promé ku esun di gobièrnu.
Duda den gobernadó
Analista i èks polítiko Ricardo Isebia ta kuestioná e aktuashon di gobernadó den henter e asuntu aki. “E ta ponemi duda den gobernadó Lucille George-Wout su imparsialidat” Isebia ta bisa. Isebia ke sa ta kiko tabata e motibu real ku gobernadó no a sigui e sekuensia di e dos petishonnan i a skohe pa esun ku a drenta último.
Di otro banda analista i èks polítiko Rufus Mc. William ta bisa ku gobernadó no tabatin otro opshon. “Gobernadó ta hefe di gobièrnu i komo tal e tin ku firma desishonnan ku gobièrnu tuma. Lokual si gobernadó por a hasi ta rekomendá gobièrnu pa bai pens’é mihó”, Mc. William ta splika.
Retiru di minister
E desishon di gabinete Koeiman pa retirá e dos ministernan di PS, Jaime Cordoba i Rutmilda Larmonie-Cecilia, a okashoná un kadena di reakshon ku a kulminá den un reunion públiko di parlamentu djabièrnè último. Eiden e mayoria nobo di 11 a skohe un presidente i vise presidente nobo i despues a retirá kuater minister demishonario i minister plenipotensiario.
E úniko dos ministernan ku a keda di spar ta promé minister Hensley Koeiman i minister di hustisia Ornelio ‘Kid’ Martina. E mayoria nobo a entrega un petishon na gobernadó pa nombra Rutmilda Larmonie-Cecilia komo formadó di un gobièrnu transitorio.
Banda di kita poder polítiko for di gobernadó Gibi Cijnte ta proponé un sistema elektoral nobo a base di distrikto kaminda e promé minister ta keda eligí direktamente.
