SCHIPHOL – Dos polis envolví den e morto di Mitch Henriquez na 2015 awe tabata dilanti wes sin ku por a mira nan. E punto di disputa di mas grandi durante di e seshon preparatorio tabata di duna e datonan personal di e sospechosonan na e abogadonan di e famianan di e defuntu. Wes ta haña ku e privasidat di e sospechosonan ta mas importante.

E dos sospechosonan, bistí na unifòrm di polis tabata sinta tras di un pantaya. Ta korte so por mira nan. Ta menta nan nòmber komo DH01 i DH02. A kambia nan bos i p’esei ta difísil pa tende kiko nan ta bisa. Tambe e abogadonan di e famianan di e defuntu, Gerald Roethof i Richard Korver, no sa e nòmbernan di e sospechosonan.

Jennifer Petrocthi, èks kasá di Mitch Henriquez (Papiamentu) i abogado Richard Korver (Hulandes) ta papia ku Pieter Hofmann (

Famianan di Mitch Henriquez ta yega na korte ku abogado Richard Korver. Potrèt: Pieter Hofmann

Segun wes ta menasá e dos polisnan seriamente, meskos ku e tres otro polisnan ku no a pèrsiguí den e kaso aki. Pero e privasidat aki, ku segun Roethof asta sospechoso di teror i di asesinato no ta haña, ta kai malu serka e famianan di e defuntu.

Tin kikmentu riba tribuna públiko. Abogado Korver: “E menasanan ta di aña pasá. Mi ta puntra mi mes kon aktual e menasa ta awor.” Durante di e seshon e ta añadí ku supuestamente e tin informashon tokante un di e sospechosonan, pero ku e no por verifiká esaki awor.

Mitch Henriquez

E trato di kontenido di e kaso ta kuminsá 6 di aprel. A reservá sinku dia den korte. E famianan di Mitch Henriquez a preferá di wanta e kaso pasobra ainda tin un prosedura ta kore pa fòrsa persekushon di e tres otro polisnan (DH03 te ku DH05). Wes ta pensa ku esaki lo tarda e kaso ku un aña i ta p’esei e no ta wanta e kaso mas.

Henriquez di 42 aña a fayesé den zomer di 2015 di violensia di polis den Zuiderpark na Den Haag. Dos di e sinku polisnan embolbí den su detenshon ta dilanti wes pa maltrato severo ku morto komo konsekuensha.