ORANJESTAD – Fundacion Lisette Gomes a entrega un manifiesto ayera na Ministerio Publico, pidiendo pa Fiscalnan exigi castigonan mas halto den casonan di abuso sexual di mucha.
Na prome instante e intencion di Lisette Gomes, presidente di e fundacion, tabata pa entrega e documento den man di Procurador General. Sinembargo el a wordo ricibi pa vocero di Ministerio Publico, Ann Angela, cu segun Gomes a lage sa cu ainda no sa si lo bay tuma contacto bek cu su persona pa un reunion of cu lo dune respuesta via un carta.
Declaracion di Lisette Gomes despues di entrega di manifiesto
Gomes ta bisa cu su accion no ta keda te akinan y cu minister di Husticia Arthur Dowers tambe lo ricibi e carta aki. Tambe lo bay entrega un otro manifiesto serca Corte na fin di maart. E intencion di Gomes ta pa keda bati na porta di tur instancia concerni pa asina yega na castigonan mas halto contra abusadornan sexual di mucha.
Lisette Gomes (links), hunto cu simpatisantenan prome cu entrega di manifiesto na Ministerio Publico. Potrèt: Ariën Rasmijn
Desconfiansa
Den e manifiesto ta indica entre otro cu den comunidad ta reinando un desconfiansa pa cu Ministerio Publico den casonan di abuso sexual di menornan. Castigonan lo ta den averahe di entre un pa dos aña y esaki segun e fundacion ta mucho abou. Fuera di esaki, segun Gomes, gobierno lo a priminti aña pasa cu instancianan cu ta duna ayudo na victimanan di abuso sexual lo haya mas subsidio y cu lo bin cu un ‘kinderombudsman’. Esaki sinembargo no a pasa te dia di awe.