WILLEMSTAD – “Ta Gerrit Schotte a orkestrá henter e kos aki, ta e a manda Jacinta Constancia dal mi un wanta” Esaki ta palabranan di parlamentario Giselle Mc William di partido MAN reakshonando riba e insidente ku a tuma lugá ayera tardi den Parlamentu di Kòrsou. Den pleno reunion públiko di parlamentu Mc William a bira víktima di agreshon físiko na man di parlamentario Jacinta Constancia di partido MFK.
Tur kos a kuminsá na momentu ku Giselle Mc William tabata na palabra i a komentá riba e kaso di froude ku ‘mondkapjes’ kaminda Jacinta Constancia ta un di e sospechosonan. N’e momentu ei Constancia tabata den e kantina di parlamentu. Ora ku Mc William a terminá su disertashon Constancia a drenta sala di reunion di parlamentu i a klap Mc William un wanta pa despues kana bai.
Video: José Manuel Dias
Akusashon
Ayera nochi durante un konferensha di prensa di partido MAN parlamentario Giselle Mc William a akusá e lider polítiko di MFK Gerrit Schotte di ta tras di e agreshon físiko kontra di su persona. Mc William ta basa su mes riba e grabashon di e reunion kaminda por mira Schotte ta drentando sala di reunion huntu ku Jacinta Constancia.
Konferensha di prensa di partido MAN, Elsa Rozendal i Giselle Mc William
“Kon ta posibel ku bo ta wak un hende ta dal un hende muhé anto bo ta pasa banda di dje manera nada no a pasa” Mc William ta puntra su mes referiendo na Gerrit Schotte ku a drenta huntu ku Jacinta Constancia. Riba e grabashon por mira tambe parlamentario Meindert ‘Menki’ Rojer di Kòrsou di Nos Tur i parlamentario independiente Melvin ‘Mac’ Cijntje ta drenta huntu ku Schotte.
Maltrato i menasa
Riba òrdu di Fiskal di Ministerio Públiko a inisiá ku un investigashon penal den e kaso aki i a prolongá detenshon di parlamentario Jacinta Constancia ku dos bes 24 ora den kuadro di e proseso di enkarselashon preventivo. Tin dos denunsia ku a keda entrega kontra Constancia. Parlamentario Giselle Mc William a entrega un keho di maltrato físiko miéntras ku su kolega di partido parlamentario Elsa Rozendaal a entrega un keho di menasa kontra di su persona.
