ORANJESTAD – Na Aruba ainda e amplifikashon di e legislashon di medio ambiente no ta bini, no opstante e promesanan ku a hasi tokante esaki for di 2008. Segun Mike de Meza, e minister arubano di Medio Ambiente, esaki ta pa motibu di falta di eksperto ku mester konsipiá e lei nobo. No ta kla si lo entregá e legislashon nobo promé ku elekshon di sèptèmber di e aña aki serka parlamento.
Na 2008 pa legislashon nobo di medio ambiente Aruba a buska ayudo serka un hurista di Hulanda. Tres aña despues tabatin un konsepto ku minister di medio ambiente Benny Sevinger, predesesor di De Meza, a palabrá ku diferente organisashon no gubernamental riba e isla. E konklushon e tempu ei tabata ku e legislashon proponé tabata muchu amplio i muchu kompliká. Te awe no a presentá un vershon mas simpel na parlamento.
Mike de Meza, e minister arubano di Medio Ambiente. Pòrtrèt: Sharina Henriquez
No aktua
E nesesidat pa mihó legislashon ambiental na Aruba a sali na kla e siman aki atrobe ku e kandela na e lugá ilegal di tira sushi na Tamarijn. Segun krítikonan gobièrnu tin añanan kaba ta skonde tras di e èksküs ku pa motibu di legislashon limitá nan no por aktua adekuadamente. I esaki miéntras ku riba e isla karibense for di trinta aña pasá un komishon spesial a konkluí ku tabata trata di sufisiente regla, pero ku un mal kumplimentu ku nan. Polis tampoko no ta alkansá di mantené e kumplimentu di e reglanan di medio ambiente eksistente.
Na Aruba tin vários lugá di tira sushi manera Tamarijn. Ta trata di lugánan di koba santu ku ta yena ku tur sorto di sushi sin kòntròl. Banda di esaki tin e dùmp di asbèst serka refineria i Aruba su lugá di tira sushi di mas grandi, Parkietenbos, tampoko no ta legal.
Maneho kontra dùmpmentu
Ministerio Públiko seis aña pasá a disidí pa un maneho kontra dùmpmentu, pero for di e dia ei no a tende kasi nada mas. E úniko ku un bosero di OM ke bisa di esaki ta: “E parti di medio ambiente, fiskal mayó Alexander van Dam no ke dil kuné aworakí. E problema t’ei, esei nos sa. Lei ta masha limitá den e área aki i ku esei tambe nos ròl. Nos ta trata di reakshoná mas adekuá posibel ora siudadano konsiente hala nos atenshon riba kos.”
Entretantu minister di Hustisia Arthur Dowers a bisa ku lo aktua kontra dùmp di Tamarijn. Pero Ministerio Públiko no a bisa nada ainda tokante e trato eksakto di e problema.