Portrèt: Ariën Rasmijn

ORANJESTAD – Pa añanan largo, un dump ilegal na Weg Fontein a opera ricibiendo asina yama sushi seco, pero tambe sushi di cas y te hasta asbest. Habitantenan di e bario a keha serca gobernantenan y instancianan pero no a haya oido.

Sinembargo, propietario di e dump ta bisa cu e mes tabata tene entre otro polis na altura di cargacionnan grandi di sushi di mata y material di construccion. Tur esaki mientras cu oficialmente tin un maneho contra dumpnan ilegal.

Un reportahe di Ariën Rasmijn

Juliana ‘Deta’ Rasmijn ta biba banda di e dump, cual tabata un buraco for di cual a saca santo cu grijs te ora cu a dicidi pa yene bek cu desperdicio di construccion y matanan. Stof tabata drentando su cas practicamente tur dia, te den oranan di marduga. Na dado momento e taxista di edad halto hasta a haya su mes bayendo specialista pa problemanan cu su wowo. Ras ta bisa cu ela yama autoridadnan diferente biaha, pero nunca esakinan lo a tuma accion contra e dump.

Sin permiso
Randy Ras ta propietario di e lugar, cual ta djis un di alrededor di 30 dump ilegal na Aruba. Ras mes ta conta Red Caribense cu na 2007 el a palabra cu minister di medio ambiente Booshi Wever cu e lo por laga companianan yena e buraco cu sushi seco. Ras no tin permiso formal pa opera e dump ilegal, aunke e lo a purba diferente biaha pa regla esaki.

Ras ta bisa cu e tabata coördina directamente cu instancianan, entre otro polis riba cargamentonan grandi di sushi bayendo pa su tereno. Ras ta declara sinembargo tambe cu e mes no por tabata tene bista riba e dump henter dia y cu pesey tin biaha sushi di cas ta yega e dump. E ta conta tambe di un incidente na unda a deposita asbest. Ras lo a percura pa esun responsabel saca e material. Randy Ras, pero tambe Deta Rasmijn, ta confirma cu nunca tabatin candela grandi riba e dump, manera na Tamarijn recientemente. Ras ta bisa cu awo e dump ta yen y cu el a dicidi pa for di awor no tuma sushi mas.

Ecotech
E compania priva di procesa sushi Ecotech ta haci uzo di e dump ilegal na Weg Fontein y tambe di un na Moko. Operations manager Andres Ras ta admiti cu e compania ta opera den un ‘area gris’ haciendo esaki, pero ta argumenta cu e dump di Parkietenbos, cual ta e unico lugar cu permiso pa ricibi sushi seco, no por tuma tur e sushi cu ta wordo produci riba e isla. Pesey tambe Ecotech y otro companianan no tin intencion di warda riba accion di gobierno, segun Ras.