KRALENDIJK – Kosta ost di Boneiru djabièrnè i djasabra a susha ku zeta. Esaki ta forma un peliger espesialmente pa para ku bini den kontakto ku e zeta ora nan ta buska kuminda. Te asina leu ku ta konosí ainda no a haña bestia sushá ku zeta.
Na promé bista un bishitante lo no mira masha kos na e kosta di baranka pegá ku Sorobon. Pero únabes ku mustra bo riba e manchanan chikitu pretu riba e barankanan bo ta mira mas i mas di nan. E sushamentu no ta un ola grandi pretu di zeta ku ta laba riba e barankanan, manera ta konosí di imágennan despues di un aksidente ku por ehèmpel un tènker. Tòg e pidanan chikí i tin bia mas grandi di zeta na e barankanan i playanan, ta peligroso pa naturalesa.
Ta eksaminá pòchi ku e zeta ku a haña, pa wak di unda e ta bini. Potrèt: Gijs van den Heuvel
Djasabra meinta kaba e organisashon di naturalesa Stinapa, ku tambe ta e kuidadó di e parke supmarino, a organisá un akshon di limpiesa. Algun desena di hende a bini e kosta serka di Sorobon. Bou di nan hopi Junior Rangers di Stinapa, hóben ku ta empeñá pa naturalesa. Nan a haña trahe blanku i hanskun di trabou pa limpia e sushedat. Esei ta hopi trabou pasobra mester frek lòs e zeta.
Un espasio enorme
Segun manager Wijnand Wolf di e parke supmarino e área di sushamentu ta asina grandi, ku Stinapa so no por solushoná e problema. “Na henter e kosta ost, di nortost te na e faro a haña zeta. Den e bahia di Sorobon tambe a mira zeta kaba.” Ta pidi yudansa di gobièrnu pa limpia e zeta.
E Junior Rangers ta bisti trahe blanku. Potrèt: Gijs van den Heuvel
Ta suponé ku e zeta ta bini di Trinidad. “Nos no sa sigur, investigashon mester prueba esaki. Pero ta masha probabel si”, De Wolf ta bisa. Na e refineria di Petrotrin na Point-a-Pierre na Trinidad riba 23 di aprel un tanki di warda zeta a rementá. Tin diferensia den e notisianan tokante di e kantidat di zeta ku a basha den Gulfa di Paria entre Trinidad i Venezuela, pero ta sigur un 50 mil i piku liter. No opstante e aktividatnan di limpiesa di outoridatnan na Trinidad i Venezuela e zeta a sigui drif den direkshon wèst. Na Venezuela a haña para sushá ku zeta. Na mitar di luna di mei e zeta a yega e gruponan di isla Los Roques i Aves, un 100 kilometer di distansha for di Boneiru.
Kòrsou
Stinapa no ta ekskluí ku e sushamentu di zeta por yega Kòrsou. Ei entre otro Klein Curaçao, Oostpunt i e bahia di Sint Joris por susha komo e proménan.