WILLEMSTAD – Un parke zoológiko sin trali ku un selva tropikal, un anfiteatro i un plan pa siña mucha tokante bestia. E plan pa Curaçao Zoo & Nature Reserve ta ambisioso, pero ku ayudo di komèrsio tòg e ta realístiko, segun direktor Hubert Isenia.
Temporada negativo
Parke Tropikal, e hardin zoológiko anterior, tabata atraé turista i habitante. Pero e lugá a deteriorá i e imágen a bira negativo. Riba Tripadvisor ta deskribí e parke komo dekaí ku bestia den kouchi chikí.
“Tabatin un temporada negativo”, Isenia ta atmití. Ela kuminsá traha na Parke Tropikal na 2011 i el a realisá lihé ku algu mester a kambia. Isenia a sera parti di e parke i a kuminsá na un plan nobo. “Tabatin falta di profeshonalismo, fondo i motivashon. E úniko manera pa sali for di esaki ta ku hopi kreatividat.”
Supsidia di gobièrnu
E kreatividat ei ta nesesario, pasobra e parke no ta permití di kobra entrada i e ta dependé di supsidio di gobièrnu. Na 2013 a subi esaki, pero e suma no ta sufisiente pa ehekutá kambionan grandi.
Aktualmente e Parke Tropikal ta será parsialmente, pero na 2023 henter e parke mester habri atrobe. E lugá mester bira outosufisiente i mester ofresé espasio pa aktividatnan komersial i edukashon. Tambe mester krea un imitashon perfekto di e ambiente natural di e bestianan. E masterplan ta kontené un área di kasi 9 hèktar; e gastunan total ta 30 mion florin.
Ambishon
“Ta zona ambisioso”, e direktor di e Fundashon Protekshon di Bestia Gregory Berry ta reakshoná. E direktiva anterior di e fundashon, den pasado tabatin diferensha di opinion ku Parke Tropikal pasobra nan tabata malkontentu ku e sirkunstanshanan di e bestianan.
Berry ta enfatisá ku un Protekshon di Bestia nunka no por para kompletamente tras di sakamentu di bestia for di nan habitat natural, pero ku e direktiva ta positivo tokante e plan nobo. “Un hardin zoológiko por ta un medio pa trese hende mas serka di bestia. Manera ta mustra, e plan parse ta kumpli ku eksigensianan di un hardin zoológiko moderno.”
Pingwino
Tòg Berry tin opheshon tambe. Espesialmente tokante e pingwinonan. “Mi no por imaginá mi ku por fria un espasio grandi sin gastu haltu. E anfiteatro tambe ta dibertido, pero si organisá algu musikal, ku ta interesante ekonómikamente, esaki no ta dushi pa e bestianan.”
Direktor Isenia no ta duda e viabilidat. E renobashon awor tin tres aña aden i entretantu a drenta míles di florin na material di kompanianan. “Material pa realisá e plan tabata e gastu di mas grandi. Esaki ta serka di solushoná. Banda di esaki nos tin basta boluntario i ami ta un perseveradó: nos ta bai ehekutá e plan aki.”
