Portrèt: José Manuel Dias

WILLEMSTAD – E di dos grupo di Krus Kòrá Kòrsou konsistiendo di 12 miembro a sali djadumingu mèrdia pa St. Maarten pa bai presta ‘mass care’ n’e víktimanan di orkan Irma. “Nos ta bai remplasá e promé grupo ku a bai Sint Maarten siman pasá i ta biniendo bèk ”, Soraida Luisa-Molina di Krus Kòrá Kòrsou a bisa.

Huntu ku e grupo aki a biaha tambe sinku otro boluntario i dòkter Caroline Saleh ku ta bai asistí e hòspital di Sint Maarten den dunamentu di kuido médiko n’e víktimanan. “Si ta nesesario lo mi bai na kas di e hendenan pa duna asistensia médiko. Prinsipalmente e yudansa sikológiko ta hopi nesesario”, dòkter Saleh a bisa. Saleh lo traha konhuntamente ku dòkter Izzy Gerstenbluth ku ta na Sint Maarten.

E ‘mass care’ ta enserá asistensia médiko, repartishon di kuminda i produktonan di promé nesesidat i limpiesa di e kasnan di e damnifikadonan di Sint Maarten.


Outor José Manuel Dias